रुकुम हत्या प्रकरण : दुबै हात बाधेको अवस्थामा बेपत्ता युवाको शब फेला !

१४ जेठ रूकुम । रुकुम पश्चिमको सोतीबाट बेपत्ता जाजरकोटका युवा लोकेन्द्र सुनारको शब दुबै हात बाधेको अवस्थामा भेरी नदीमा भेटिएको छ । बुधबार सुर्खेतबाट आएको तालिमप्राप्त गोताखोर टोलीले जाजरकोट रानागाउँका युवा लोकेन्द्र सुनारको शब भेटाएको जिल्ला प्रहरी कार्यालय जाजरकोटले जनाएको छ ।

डिएस्पी किशोर श्रेष्ठका अनुसार गोताखोर टोलीले भेरी नगरापालिका १ कुदुस्थित भेरी नदीमा शब भेटाएको हो । यससँगै रुकुम पश्चिमको सोतीमा ज्यान गुमाउनेको संख्या ४ पुगेको छ । यसअघि नवराज विक, टीकाराम सुनार र गणेश बुढाको शब भेटिएको थियो ।

दुई जना अझै बेपत्ता छन । रुकुम पश्चिमको चौरजहारी नगरपालिका ८ सोतीमा विवाहका लागि प्रेमिकालाई भगाउन गएका नवराज लगायत ६ जना युवाहरुलाई स्थानीयले लखेटेर हत्या गरेका पीडित परिवारको आरोप छ । भेरी नदीमाथिको पुल समेत बन्द गरेर युवाहरुलाई कुटपिट गरेपछि भेरी नदीमा फालिएको पीडितको भनाई छ ।

प्रहरीले युवतीका बुवा आमासहित सोतीका वडाध्यक्ष डम्बर मल्ल लगायत १६ जनालाई पक्राउ गरेर अनुसन्धान गरिरहेको छ । सरकारले घटनाको निष्पक्ष छानबिनका लागि ५ सदस्यीय छानबिन समिति गठन गरेको छ ।