आजबाट राजधानीका पसल खुले

२२ जेठ, काठमाडौं । खड्गप्रसाद ओलीले लकडाउनलाई सत्ता रक्षाको कवच बनाउने हेतुले प्रयोग गर्न थालेको अनुभूति भएपछि अवज्ञाको लहर सुरु भएको छ । यसैक्रममा आज उपत्यकाका साना व्यापारीले पसल खोल्ने निर्णय गरेका छन् ।

नेपाल राष्ट्रिय व्यावसायी महासंघले आजबाट उपत्यकाका न्यूरोड लगायत मुख्य व्यापारिक स्थानमा सामाजिक दूरी कायम राखी व्यावसाय सञ्चालन गर्ने निर्णय गरेको छ । ओली सरकारले कोरोना भाइरसविरुद्ध लड्न लकडाउनलाई मात्रै निर्बिकल्प अस्त्रका रुपमा प्रयोग गर्ने तर व्यावसायीलाई कर तिर्न भने ताकेता गर्ने नीति लिएपछि यस्तो अवस्था आएको हो ।

महासंघका अध्यक्ष नरेश कटुवालले अब सरकारको गैरजिम्मेवार प्रवृत्तिलाई अवज्ञा गर्नुको बिकल्प नरहेको पनि स्पष्ट गरे । हामीले आफ्ना सबै सदस्यलाई आजैबाट पसल, व्याबसाय सञ्चालन गर्न आह्वान गरेका छौं– अध्यक्ष कटुवालले भने । महासंघको उपत्यकामा मात्रै २७ वटा सदस्यहरु रहेका छन् । प्रत्येक सदस्यमा झण्डै एक हजारको संख्यामा पसलहरु आवद्ध छन् ।

अध्यक्ष कटुवालका अनुसार, देशै भरिका व्यावसायीलाई पसल सञ्चालन गर्न आह्वान गरिएको छ । महासंघ मातहत ठूला मल, कम्प्लेक्स, गार्मेण्ट लगायत आवद्ध छन् । सरकार हाम्रा समस्याप्रति अनुदार भएपछि वाध्य भएर यस्तो अप्रिय निर्णय लिनुपरेको हो भन्दै अध्यक्ष कटुवालले भने– हामीले पसल खोल्दा प्रशासनले बल प्रयोग ग¥यो भने सरकारलाई कर तिर्न वाध्य छैनौं । बैंकको व्याज, घरभाडा र कामदारको तलब दिन पनि अब व्यावसाय नचलाउनुको बिकल्प रहेन ।

तर व्यावसाय गर्दा अन्तराष्ट्रिय अभ्यासको भने ख्याल गरिने पनि उनले बताए । सकेसम्म स्वास्थको ख्याल राखेर हामीले पसल सञ्चालन गर्ने हो भन्दै अध्यक्ष कटुवालले यसो गरियो भने मात्र सरकारलाई राजश्व तिर्न सकिने धारणा राखे ।

कोरोना भाइरसको महामारीबाट बच्नका लागि गरिएको लकडाउनले देशको अर्थतन्त्र ठप्प भएको र सरकारले भाइरसको रोकथामका लागि बढाएको लकडाउनका कारण व्यवसायीहरु निकै मारमा परेका छन् । सरकारले नेपालमा तीव्र रुपमा कोरोना भाइरस संक्रमण फैलिरहेका कारण जेठ ३२ गतेसम्म लकडाउन लम्ब्याएको छ ।