लकडाउनको आज ७४ औं दिन, सडकमा सवारी साधनको चाप बढ्याे

२३ जेठ, काठमाडौं । विश्वभर फैलिएको कोरोना भाइरसका कारण सरकारले रोकथाम तथा नियन्त्रणका लागि लागु गरेको लकडाउनको आज ७४ औं दिन पुगेको छ । सरकारले गत चैत ११ गते यता कोरोना रोकथामका लागि लकडाउन गर्दै आएको छ । पछिल्लो पटक जेठ ३२ गते सम्मका लागि लकडाउन लम्ब्याइएको छ ।

सरकारले लकडाउन लम्ब्याउँदै जाने र कोरोना संक्रमणको जोखिम पनि बढ्दै जाने भएकाले आर्थिक जीवनमा असर परेको भन्दै मानिसहरु काममा निस्किएका छन् । जसका कारण मुख्य सडकहरुमा सवारी साधनको चाप बढेको छ । प्रहरीले सवारी साधनको जाँचलाई केही खुकुलो बनाएको छ । अत्यावस्यक सेवा, ढुवानी सेवा, पासवाहक सवारी साधन बाहेक पनि सरकारी कर्मचारी, बैंकका तथा उद्योग प्रतिष्ठानका कर्मचारी र व्यवसायीलाई परिचय पत्र हेरी सवारी सञ्चालन गर्न दिइएको छ ।

कुनैपनि कार्यालयको परिचयपत्र नलिई सवारी साधन चलाउनेलाई भने प्रहरीले नियन्त्रणमा लिई कारबाही गरेको छ । निजी क्षेत्र तथा विज्ञहरुले पनि लकडाउनको ढाँचा परिवर्तन गरी जनजीवनलाई सहज बनाउन सुझाव दिँदै आएका छन् ।

यसैबीच, विश्वमै सबैभन्दा लामो लकडाउन नेपालमा गरिएको र संक्रमणको दर रोक्न नसकिएकोले लकडाउनको मोडालिटी परिवर्तन गर्ने तयारी सरकारले गरिरहेको छ । चीनको वुहानबाट सुरु भएको कोरोना संक्रमण नियन्त्रणका लागि चीनले पनि ७४ औं  दिनपछि लकडाउन खोलेको थियो । तर नेपालमा भने लकडाउनको ७४ औं दिन पुग्दा संक्रमणको दर झनै बढ्दै गएको छ ।

उद्योगी, व्यवसायी तथा सर्वसाधारणले लकडाउनबारे विचार गर्न सरकारसँग माग गरिरहेका बेला मन्त्रिपरिषद्‌मा त्यसबारे छलफल भएको र उपयुक्त निर्णय लिन प्रस्ताव तयार पार्न थालिएको बताइएको छ । चैतको दोस्रो सातादेखि सुरु भएको लकडाउनको शैलीमा केही परिमार्जन गरिएको भएपनि यसलाई जेठ मसान्तसम्म निरन्तरता दिने विचारमा सरकार भएको बताइन्छ।