न्यूरोडका व्यापारी भन्छन्, हाम्रो चुलो बाल्ने वातावरण बनाइदे सरकार !

२८ जेठ, काठमाडौं । न्यूरोड क्षेत्रका व्यापारीहरुले लकडाउनको उल्लंघन गर्दै पसल व्यवसाय संचालन गर्ने बताए पनि प्रहरी हस्तक्षेपका कारण पसल बन्द भएका छन् ।

बुधबार व्यवसयीहरुले सबै प्रकारका पसलहरु खोले पनि प्रहरीले पुनः बन्द गरेपछि बिहान केहीबेर तनावको अवस्था सिर्जना भएको थियो । प्रहरीले पसलहरु बन्द गराएको विरोधमा व्यापारीहरुले विरोध प्रदर्शन गरेका छन् । व्यापारीहरुले न्यूरोड क्षेत्रमा केहीबेर विरोध प्रदर्शन गरेका हुन् ।

लगातारको लकडाउनका कारण आफूहरु मर्कामा परेको र सरकारले कुनै विकल्प नदिएका कारण आफूहरु पसल खोल्न बाध्य भएको तर त्यसमा पनि प्रहरीले हस्तक्षेप गरेको नेपाल राष्ट्रिय व्यवसायी महासंघका अध्यक्ष नरेश कटुवालले बताए ।

सबै प्रकारका व्यवासयहरु सञ्चालन गर्न पाउनु पर्ने र प्रहरी हस्तक्षेप रोकिनु पर्ने मागसहित देशभर प्रदर्शन जारी रहने उनले बताएका छन् । ठूलो संख्यामा व्यापारीहरू सडकमा उत्रिएपछि प्रहरीहरूको तैनाथी पनि बढाइएको छ ।

व्यापारीहरूले ‘हाम्रो चुलो बाल्ने वातावरण बनाइदे, सरकार’, ‘रहरले होइन, बाध्यताले आएका हौं’ लगायतका नारा लेखिएका प्लेकार्डहरू बोकेका छन् । सरकारले ठूला व्यापारी र साना व्यापारीलाई भेदभाव गरेको गुनासो गर्दै उनीहरूले आफूहरूको घर भाडा मिनाहा गर्न, बैङ्क तथा वित्तीय संस्थाको ब्याज मिनाहा गर्न मागसमेत गरेका छन् ।

मंगलबार व्यवसायीहरुले पसल खोल्दा प्रहरीले पसलहरु बन्द गर्नुका साथै व्यवसायीहरु र प्रहरीबिच झडप पनि भएको थियो। प्रहरीको हस्तक्षेपलाई लिएर नेपाल राष्ट्रिय व्यवसायी महासंघका अध्यक्ष कटुवालले सरकारले व्यवासय संचालन गर्ने सम्बन्धी ठोस निर्णय नलिएमा आन्दोलन गर्ने चेतावनी दिएका थिए।