अब रातीमा गाडी चार्ज गर्दा सस्तो

३ असार, काठमाडौं । अब रातको समयमा विद्युतीय गाडी चार्ज गर्दा महसुल सस्तो पर्ने भएको छ। विद्युत नियमन आयोगले असारबाटै लागू हुने गरी चार्जिङ स्टेसनको शुल्क निधारण गरेसँगै गाडी चार्ज गर्दा महसुल सस्तो पर्ने जनाएकाे हाे ।

विद्युत नियमन आयोगले चार्जिङ स्टेसन सञ्चालकले अधिकतम् २० प्रतिशतसम्म मुनाफा लिन पाउने गरी यातायातका विद्युतीय सवारी साधन चार्ज गर्ने महसुल दर तोकेको हो । विद्युत नियमन आयोगले स्वाप सुविधा लिने ग्राहकसँग सिजनल ‘मौसमी’ रुपमा र विहान, दिउँसो र बेलुका मूल्य फरक लिनुपर्ने गरी महसुल तोकेको छ ।

यस अनुसार, अब ३३ केभीको लाइन लिएर साँझ ५ बजेदेखि राति ११ बजेसम्म चार्जिङ स्टेसनमा सवारी साधन चार्ज गरेमा प्रति किलोवाट घण्टा ८ रुपैयाँ ४० पैसा लाग्ने छ। राति ११ बजेदेखि बिहान ५ बजेसम्मका लागि सबैभन्दा सस्तो ४ रुपैयाँ ४५ पैसा लाग्ने छ भने बिहान ५ बजेदेखि साँझ ५ बजेसम्मका लागि ६ रुपैयाँ ६० पैसा शुल्क लाग्ने छ।