प्रहरीले लाठी हान्दा सांसद लक्ष्मी परियार घाइते, वीरमा उपचार हुदैँ

१० असार, काठमाडौँ । सांसद लक्ष्मी परियार पक्राउ परेकी छन । रुकुम पश्चिममा भएको जातीय नरसंहारको विरोधमा प्रधानमन्त्री केपी शर्मा ओलीलाई ज्ञापन पत्र बुझाउन गएका सांसदसहित १५ जनालाई प्रहरीले पक्राउ गरेर महेन्द्र पुलिस क्लब भृकुटीमण्डपमा राखेको छ ।

संयुक्त दलित राजनीतिक संघर्ष समितिका तर्फबाट ज्ञापनपत्र बुझाउन प्रधानमन्त्री निवास बालुवाटार गएकी सांसद परियारलाई समेत प्रहरीले पक्राउ गरेको हो । प्रदर्शनका क्रममा प्रहरीले लाठी चार्ज गर्दा उनी घाइते भएकी छन । परियार नेपाली कांग्रेसकी समानुपातिक सांसद हुन ।

प्रहरीको लाठी चार्जबाट सांसद परियारका तीन वटा औला भाँचिएका छन । उनको वीर अस्पतालमा उपचार भइरहेको छ । पक्राउ पर्नेमा पूर्वसांसद जीवन परियार, सुनिता मरिक ‘डोम’, दुर्गा बराइली, राजकुमार हिङमाङ, शर्मिला बागचन्द, शोभा सेन्चुरी, नानीमाया पुर्कोटी, हिक्मत महरा, लक्ष्मी थापा र राम नेपाल लगायत रहेका छन ।