झापाको गाउँसभाका अध्यक्षमाथि मुक्का प्रहार

११ असार, झापा । गाउँमा बजेट बाँडफाँड हुने दिनमै झापामा कुटाकुट भएको छ । हल्दिवारी गाउँपालिकाको गाउँसभामा केही सदस्यबीच कुटाकुट भएको हो । अध्यक्ष रविन्द्र लिङ्गदेनलाई केही सदस्यले मुक्का प्रहार गरेपछि विवाद झगडामा परिणत भएको हो । घाइतेको भद्रपुरस्थित मेची अस्पतालमा उपचार भइरहेको छ । घटनामा पालिकाका केही कुर्सी, टेबल पनि भाँचिएका छन् ।

अध्यक्ष लिङ्गदेनले नेकपाबाट निर्वाचित गाउँ सभा सदस्यबाट आक्रमण भएको आरोप लगाएका छन् । गाउँ सभामा प्रस्तुत नीति तथा कार्यक्रमका अन्तरबस्तुमा सभा सदस्यसँग सुझाव संकलन गर्ने क्रममा विमती सिर्जना भएपछि एकैपटक आक्रमण सुरु भएको उनको भनाइ छ ।

यद्यपि, गाउँपालिकाका वडा नम्बर ३ का अध्यक्ष त्रिलोचन सापकोटा भने अध्यक्षकै डिजाइनमा गाउँ सभा भाँडिएको बताउँछन् । हल्दिवारीमा बहुमत कार्यपालिका सदस्य नेकपाका रहेका कारण अल्पमतमा रहेका गाउँपालिका अध्यक्षले आफ्नो पार्टीको नीति र लक्ष्य अनुसार काम गर्न नपाएको नेकपा पक्षको आरोप छ ।

गाउँसभामा एकमत नभएपछि वार्ता र छलफलबाट विवाद समाधान गर्नुको साटो कुटाकुट हुने गरेको छ ।