एकैदिन थपिने कोरोना संक्रमित अमेरिकामा भन्दा ब्राजिलमा धेरै

११ असार, काठमाडौं । एकैदिन थपिने संक्रमितमा अमेरिकाभन्दा धेरै ब्राजिलमा रहेको पाइएको छ । पछिल्लो चौबिस घण्टामा अमेरिकामा ३८ हजार संक्रमित थपिदा ब्राजिलमा भने ४० हजार नयाँ संक्रमित भेटिएका छन ।

अमेरिकामा पछिल्लो चौबिस घण्टामा ३८ हजार ३ सय ८६ संक्रमित थपिएका हुन । ब्राजिलमा भने दुई हजार बढी अर्थात ४० हजार ९ सय ९५ संक्रमित भेटिएका छन । दुबै देशमा भेटिएका नयाँ संक्रमितमध्ये यो अहिलेसम्मकै धेरै संख्या हो ।

यससँगै अमेरिकामा कोरोना संक्रमितको संख्या बढेर २४ लाख ६२ हजार पुगेको छ । यस्तै ब्राजिलमा संक्रमितको संख्या ११ लाख ९२ हजार पुगेको छ । कोरोना मृत्तकको संख्या भने अमेरिकामा सबैभन्दा धेरै छ ।

जहाँ अहिलेसम्म १ लाख २४ हजार बढी मानिसको ज्यान गएको छ । ब्राजिलमा अहिलेसम्म ५३ हजार बढीको मृत्यु भएको छ । पछिल्लो चौबिस घण्टामा अमेरिकामा ८ सय बढी र ब्राजिलमा ११ सय बढीको मृत्यु भएको छ ।

कोरोनाले सबैभन्दा धेरै प्रभावित हुने देशमा अमेरिका पहिलो, ब्राजिल दोस्रो, रुस तेस्रो र भारत चौथो हो । यो समाचार तयार पार्दासम्म विश्वभर ९५ लाख संक्रमित छन भने ४ लाख ८५ हजार बढीको ज्यान गएको छ । संक्रमितमध्ये ५१ लाखभन्दा धेरै कोरोना जितेर घर फर्किएका छन ।