स्याङ्जाको वालिङमा एमसीसीको विरोध

११ असार, स्याङ्जा । स्याङ्जाको वालिङ नगरपालिकाका स्थानीय युवाले मिलेनीएम च्यालेन्ज कर्पोरेशन (एमसीसी) लगायतका सामसामयिक घटना क्रमलाई जोडेर विरोध प्रदर्शन गरेका छन् । उनीहरुले एमसीसी खारेज, भ्रष्टाचारीलाई कारवाही, सरिता गिरीलाई कारवाही गर, सचेत नागरिक एक हौं भन्ने जस्ता नारा लेखेर विरोध प्रदर्शन गरेका हुन् ।

वालिङ नगरपालिका ११ स्थित पर्यटकीय क्षेत्र बाहुनथानमा पुगेर उनीहरुले प्रदर्शन गरेका थिए । बाहुनथानमा राखिएको नेपालको राष्ट्रिय १२ फिट अग्लो झण्डामुनि बसेर युवाहरुले शान्तिपूर्ण प्रदर्शन गरेका हुन् । उनीहरुले नियमित ३-४ दिनदेखि बिहानको समय बाहुनथानमा बसेर विरोध गर्दे आएको जनाए ।

अगाडि र पछाडि राष्ट्रिय झण्डालाई साक्षी राख्दै कुनै पनि संघसंस्था र संगठनमा आवद्ध नभइ एक सच्चा नेपालीका नाताले स्वतःस्फुर्त रुपमा प्रदर्शन गरेको सहभागी मध्येका एक युवा कृष्ण डुम्रेले जानकारी दिए । अमेरिकाको ५० करोड डलर अनुदान सहयोगका नाउँमा नेपालका न्याय कानून सबै मिचिने छन् भन्दै उनीहरुले त्यस्तो हुन दिंदैनौं, एमसीसी पास भएमा नेपाल अफगानिस्तान जस्तो बन्ने दाबी गरे ।

एमसीसी सम्झौता कार्यान्वयनका लागि परियोजना र नेपाल र सरकारबीच भएको सहमति अनुसार असार १६ देखि परियोजना कार्यान्वयन सुरु हुने सहमति गरिएको छ । एमसीसी अन्तर्गतका परियोजना कार्यान्वयन सुरु भएको ५ वर्षमा नसकिए बाँकी अनुदान रकम फिर्ता जाने प्रावधान छ । एमसीसी परियोजनामा झन्डै ५५ अर्ब नेपाली रुपैयाँ ऊर्जा र यातायात र पूर्वाधारका क्षेत्रमा खर्च गरिने सहमति छ ।