राजु सदाको परिवारलाई ५ लाख सहयोग गरिने

१२ असार, धनुषा। आइसोलेसनमा ज्यान गुमाएका धनुषाको हंसपुर नगरपालिकाका राजु सदाको परिवारलाई सहयोग उपलब्ध गराइने भएको छ । सदाको परिवारलाई प्रदेश सरकारले ५ लाख रुपैयाँ सहयोग गर्ने घोषणा गरेको हो ।

प्रदेश २ का आन्तरिक मामिला तथा कानुन मन्त्री ज्ञानेन्द्र यादवले सदाको परिवारलाई अन्तरिम राहत स्वरुप ५ लाख उपलब्ध गराइने जानकारी दिए । घटनाको छानबिनका लागि गठित समितिले काम सुरु गरिसकेको जनाउँदै मन्त्री यादवले छानबिनमा दोषी देखिने जोकोहीलाई कारबाही गरिने पनि प्रष्ट पारेका छन् ।

प्रदेश सरकारले बिहीबार मात्र १६ वर्षीय राजु सदाको मृत्युबारे छानबिन गर्न स्वास्थ्य निर्देशनालयका निर्देशक हरिश्चन्द्र शाहको संयोजकत्वमा तीन सदस्यीय छानबिन समिति गठन गरेको छ । जेठ ३ गते भारतको अहमदावादबाट आएका राजुलाई १७ दिनसम्म क्वारेन्टाइनमा राखिए पनि झाडापखाला लाग्दा राम्रो उपचार नपाएर सोमबार मृत्यु भएको थियो