स्याङ्जाका ३४ जनाले कोरोना जितेर फर्के, २२ नयाँ थपिए

१३ असार, स्याङ्जा । स्याङ्जामा शनिवार ३४ जना कोरोना संक्रमितले कोरोनालाई जितेर घर फर्किएका छन् भने २२ जना नयाँ संक्रमित थपिएका छन् । स्याङ्जामा हालसम्म कोरोना संक्रमणलाई जित्नेको संख्या ५६ पुगेको छ भने संक्रमितको संख्या १ सय ५९ पुगेको छ ।

कालिका सामुदायिक अस्पताल हेलुमा रहेका ३४ जना संक्रमितको दोस्रो परीक्षण नेगेटिभ आएपछि उनीहरुलाई शनिवार घर पठाईएको स्याङ्जाका प्रमुख जिल्ला अधिकारी गंगाबहादुर क्षेत्रीले जानकारी दिए । अस्पतालमा रहेका ४१ जना संक्रमितको दोस्रो परिक्षणका लागि स्वाव संकलन गरि पठाईएकोमा ७ जनाको भने दोस्रो परिक्षण पनि पोजेटिभ नै आएको छ भने अन्यको नेगेटिभ आएको छ । शनिवार घर फर्कनेहरुमा गल्याङ नगरपालिकाका १६ जना, वालिङका १० जना, आँधीखोला गाँउपालिकाका ४ जना, अर्जुनचौपारी गाँउपालिकाका ३ जना र भीरकोट नगरपालिकाका १ जना रहेकोको प्रजिअ क्षेत्रीले बताए ।

अहिलेसम्म स्याङ्जामा कोरोना संक्रमणबाट दुईजना पुरुषले ज्यान गुमाएका छन् । कोरोनामुक्त भएकाहरुलाई भीरकोट नगरपालिकाका प्रमुख छायाँराम खनाल, वालिङ नगरपालिकाका प्रमुख दिलिपप्रताप खाँण, स्वास्थ्य कार्यालय स्याङ्जाका प्रमुख यामप्रसाद शर्मा र स्वास्थ्यकर्मी लगायतले बिदाई गरेका थिए । शनिवार गण्डकी प्रदेश स्वास्थ्य निर्देशनालयले दिएको रिर्पोटमा १२ महिने बच्चासहित २२ जनामा कोरोना संक्रमण पुष्टि भएको जनाएको छ ।

एकै घरका श्रीमान, श्रीमति र बच्चासहित २२ जनामा संक्रमण देखिएको छ । १७ पुरुषसहित ६ महिलामा कोरोना संक्रमण देखिएको स्वास्थ्य कार्यालयले जनाएको छ । नयाँ थपिनेमा अर्जुनचौपारी गाँउपालिकाका १९ जना रहेका छन् भने पुतलीबजार नगरपालिकाका १ पुरुष, बिरुवाका १ पुरुष र वालिङका १ पुरुष रहेका छन् । थपिने संक्रमित सबै भारतबाट आएर क्वारेन्टाइनमा बसेका मानिसहरु हुन् । संक्रमितहरुलाई थप उपचारका लागि आइसोलेसनमा ल्याउने तयारी भइरहेको प्रमुख जिल्ला अधिकारी गंगाबहादुर क्षेत्रीले जानकारी दिए । जिल्लामा ११ पालिका मध्ये अहिलेसम्म फेदिखोला गाँउपालिका बाहेक सबैमा कोरोना संक्रमण देखिएको छ ।

जिल्ला प्रशासन कार्यालय स्याङ्जाले दिएको जानकारी अनुसार पुतलीबजार २, वालिङ ३४, गल्याङ् ३१, भीरकोट १, र चापाकोट नगरपालिकामा १६ जना संक्रमित भेटिएका छन् भने आँधीखोला ४, विरुवा २, हरिनास २, कालीगण्डकी १५ र अर्जुनचौपारी गाँउपालिकामा ३७ जनामा कोरोना संक्रमण भेटिएको छ । संक्रमण देखिएका मध्ये सबै भन्दा बढी अर्जुनचौपारी गाँउपालिका रहेको छ ।