कर्णालीमा कोरोना जित्नेको संख्या १ हजार नाघ्यो

१५ असार, सुर्खेत । कर्णालीमा कोरोना जितेर घर फर्किनेको संख्या एक हजार नाघेको छ । कर्णालीको सामाजिक विकास मन्त्रालयको स्वास्थ्य सेवा महाशाखाले अहिलेसम्म १ हजार १ जना कोरोना जितेर डिस्चार्ज भएका जनाएको हो ।

आज मात्रै कर्णालीमा ४५ जना डिस्चार्ज भएका थिए । दैलेख, सुर्खेतका विभिन्न अस्पतालबाट उनीहरु डिस्चार्ज भएका हुन । यस्तै, सोमबार कर्णालीमा एकजना संक्रमित थपिएका छन् । जुम्लास्थित कर्णाली स्वास्थ्य विज्ञान प्रतिष्ठानमा भएको परीक्षणबाट रुकुम पश्चिमका एकजना युवकमा कोरोना पुष्टि भएको हो ।

पछिल्लो २४ घण्टामा थपिएका एक सहित कर्णालीमा संक्रमितको संख्या १४२७ पुगेको छ ।