साउन ६ सम्म व्यावसायिक उडान बन्द

१८ असार, काठमाडाैं । सरकारले आन्तरिक तथा अन्तराष्ट्रिय हवाई सेवामा लगाएको प्रतिबन्ध थप गरेर साउन ६ सम्म पुर्याएको छ । यघि व्यावसायिक हवाई सेवाको उडान तथा अवतरणमा असार २१ गते गतेसम्म रोक लगाईएकोमा समय थप गरेर साउन ६ गतेसम्म पुर्याइएको हो ।

गत सोमबार बसेको मन्त्रिपरिषद्को बैठकले आन्तरिक तथा अन्तर्राष्ट्रिय व्यावसायीक उडानमा लगाएको प्रतिबन्ध थप गरी २०७७ सालको साउन ६ गतेसम्म कायम रहने निर्णय गरेको हो । उडान रोक्न सरकारले चैत ९ गतेयता गरेको यो आठौं निर्णय हो ।

प्रधानमन्त्री केपी शर्मा ओलीको चैत ८ गते गरेको राष्ट्रको नाममा सम्बोधन मार्फत कोरोना भाइरस जोखिम न्युनिकरणका लागी भन्दै अन्तर्राष्ट्रिय हवाई चैत ९ देखि १८ गतेसम्म सेवामा प्रतिबन्ध लगाउने बताएका थिए । त्यस पछि सरकारले उडानमा समय थप गर्दै व्यावसायिक उडानमा प्रतिबन्ध लगाउँदै आएको छ ।

त्यसपछि चैत १९ देखि वैशाख ३ सम्म, वैशाख ४ देखि १८ सम्म, वैशाख १९ देखि जेठ २ सम्म, जेठ ३ देखि १८ सम्म, १९ देखि जेठ ३२ र असार १ देखि २१ सम्म व्यावसायिक उडानमा रोक लगाइएको थियो । आठौं पटकको निर्णयले १६ दिन थप गरेको छ । यी निर्णय मन्त्रीपरिषद् तथा सीसीएमसीले संयुक्त रुपमा गर्दै आएका छन् । व्यावसायिक उडानमा रोक लगाइए पनि संस्कृति, पर्यटन तथा नागरिक उड्डयन मन्त्रालयले उद्धार गर्न/गराउन चार्टर उडान अनुमति भने दिँदै आएको छ ।

मन्त्रालयको नागरिक उड्डयन महाशाखाले विदेशमा अलपत्र परेका नेपालीलाई उद्धार गर्न असार ३१ सम्म अनुमति जारी गरेको छ । यो तेस्रोपटक जारी भएको अनुमति हो । पहिलोपटक २९ जेठदेखि खुला गरिएको नेपाली नागरिक उद्धार चार्टर उडानको म्याद असार ११ सम्म थियो । त्यसपछि मन्त्रालयले दोस्रोपटक असार १६ गतेसम्मका लागि उडान तालिका र भाडादर निकालेको थियो । बुधबारदेखि लागू भएको तेस्रोपटकको चार्टर उडान तालिका ३१ असारसम्म कायम रहने छ