धार्मिक ग्रन्थका पाना ५ करोडमा बेच्न खोज्ने ६ जना पक्राउ

काठमाडौं । सुनका अक्षरले लेखिएको धार्मिक ग्रन्थको पाना भन्दै विक्री गर्ने ६ जनालाई प्रहरीले पक्राउ गरेको छ । विशेष सूचनाको आधारमा महानगरीय प्रहरी वृत्त थानकोट र महानगरीय अपराध महाशाखाको संयुक्त टोलिले बुधबार उनीहरुलाई पक्राउ गरेको हो ।

काठमाडौंको चन्द्रागिरि नगरपालिका १५ ढुंङ्गेअड्डा स्थितमा केही मानिसहरुले लामा भाषामा लिखित पुरानो बुद्ध धर्म ग्रन्थको खरिद बिक्रि गर्न मोलमोलाई गरिरहेको सुचनामा प्रहरीले उनीहलाई पक्राउ गरेको हो ।

पक्राउ पर्नेमा खोटाङ दिक्तेल ४ का ३२ बर्षीय गेहेन्द्र सिंह आत्रय, काभ्रे पाँचखाल ३का ४२ बर्षीय जनक गिरी, ओखलढुंगा मानेभन्ज्याङ १ का ३१ बर्षीय सुबास कुमार बस्नेत रहेका छन । यस्तै ओखलढुंगा सुनकोशी २ घर का ३३ बर्षीय हरी बहादुर लामिछाने, काठमाडौँ तारकेश्वर ११ का ६४ बर्षीय राजेन्द्र बहादुर जोशी र नुवाकोट ककनी ८ का ३४ बर्षीय रोशन तामाङ रहेका प्रहरीले जनाएको छ ।

पक्राउ परेकामध्ये जनक गिरीको साथबाट तिब्बतीयन लिपिमा सुनौलो अक्षरले लेखिएको बुद्ध धर्मको ग्रन्थ लेखिएका १६ पाना र ती पाना पाँच करोड रुपैयाँमा खरिद बिक्रीका लागि मोलमोलाई भइरहेको प्रहरीको दाबी छ ।

उनीहरुमाथि प्राचीन स्मारक संरक्षण ऐन २०१३ बमोजिम थप अनुसन्धान भइरहेको महानगरीय अपराध अनुसन्धान महाशाखाले जनाएको छ ।