नेपाल भारत सीमामा झडप, दुई सशस्त्र प्रहरी घाइते

४ साउन, विराटनगर । झापाको नेपाल–भारत सीमावर्ती क्षेत्रमा झडप भएको छ । गौरीगञ्ज गाउँपालिका ५ मलाहका टोल नजिकैको सीमा क्षेत्रमा शनिबार राति प्रहरी र भारतीय नागरिकबीच झडप भएको हो ।

सीमावर्ती भारतीय गाउँबाट घरेलु हतियारसहित आएको समूहले सशस्त्र प्रहरीमाथि आक्रमण गरेपछि भिडलाई नियन्त्रणमा लिन ४ राउण्ड हवाई फायर गरिएको सशस्त्र प्रहरीले जनाएको छ । हवाई फायर गर्दा सशस्त्र प्रहरीका दुई जना जवान घाइते भएका छन ।

सीमा स्तम्भ १५२ नजिकै मलाह टोलका भारतीय नागरिकले सशस्त्र प्रहरीको टोलीमाथि आक्रमण गरेको दाबी छ । नेपालतर्फ सामान तस्करी हुँदै आएको थियो । लकडाउनसँगै प्रहरीले नाकामा कडाई गरेपछि तस्करको समूह योजनावद्ध रुपमा आक्रमणका लागि आएको प्रहरीले बताएको छ ।

झडपपछि अवस्था सामान्य भएकाले भारतीय प्रहरीसँग वार्ताको तयारी भइरहेको पनि सशस्त्र प्रहरीको भनाई छ ।