महालक्ष्मी विकास बैंकको सीईओमा सागर शर्मा नियुक्त

५ साउन, काठमाडौं । महालक्ष्मी विकास बैंकको प्रमुख कार्यकारी अधिकृत (सीईओ) मा बैंकर सागर शर्मा नियुक्त भएका छन् । बैंकका वरिष्ठ नायव प्रमुख कार्यकारी अधिकृत सागर शर्मालाई २ साउनमा बसेको सञ्चालक समितिको वैठकले कायममुकायम प्रमुख कार्यकारी अधिकृतको रुपमा नवनियुक्त गरेको हो ।

यसअघि ४ बर्षका लागि नियुक्त भएका बैंकर कृष्णराज लामिछानेले ३२ महिनामै सीईओबाट राजीनामा दिएपछि बैंकमा सीईओ रिक्त भएको थियो । कामु सीईओको जिम्मेवारी पाएका शर्मा मर्ज अघि यति विकास बैंकको सीईओ भईसकेका थिए । नवनियुक्त कामु सीईओलाई आज केन्द्रिय कार्यालय दरबारमार्गमा बैंक परिवारको तर्फबाट स्वागत कार्यक्रम सम्पन्न गरिएको थियो ।

उक्त कार्यक्रममा कामु सीईओ शर्माले बैंकप्रतिको जनविश्वास, निष्ठा कायम राख्दै गुण्स्तरिय सेवा प्रदान गर्न सदा तत्पर रहने प्रतिबद्धता जनाएका छन् । त्यसैगरी उनले बैंकको लक्ष्य र उद्देश्य प्राप्तिका लागि आफु साथसाथै सम्पूर्ण कर्मचारीलाई प्रयत्नशिल रहन आग्रह गरेका छन् ।