पहिरोले राजमार्ग अवरुद्ध भएपछि हेलिकोप्टरबाट विरामीको उद्धार

६ साउन, काठमाडौं । अविरल बर्षापछि आएको बाढी र परिरोका कारण सडक अवरुद्ध भएपछि बिरामी, बैंकका कर्मचारीको हेलिकोप्टरबाट उद्धार गरिएको छ ।

पहिरोले अवरुद्ध पृथ्वी राजमार्ग खुल्न नसक्दा धादिङ र चितवनको सीमाना मौवाखोलाबाट दुई जना बिरामी र केही बैंकका कर्मचारीलाई सिम्रिक र कैलाश एयरको हेलिकोप्टरबाट उद्धार गरिएको हो ।

चितवनका सहायक प्रमुख जिल्ला अधिकारी नेत्रप्रसाद शर्माले गोरखा पालुङटारका बिरामीलाई हेलिकोप्टरबाट उद्धार गरी काठमाडौ लगिएको बताए । तर उनीहरुको परिचय भने गोप्य राखिएको छ ।

हिजोदेखि अवरुद्ध सडक आज पनि खुल्ने सम्भावना कम रहेपछि बिरामीको अवस्था हेरेर हेलिकोप्टरबाट उद्धार गरिएको उनले बताए । उनीहरु दुवै दम र प्यारालाईसीसका बिरामी रहेको प्रमुख जिल्ला अधिकारी शर्माले बताए ।

यसरी उद्धार गरिनेमा बैंकका कर्मचारी पनि छन् । सानिमा बैंकका कर्मचारी चढेको गाडी पहिरोका कारण अलपत्र परेपछि हेलिकप्टरबाट उनीहरु काठमाडौ गएका उनले बताए । यस्तै सडक अवरुद्ध हुँदा चितवनबाट गोरखामा एक जनाको शव पनि हेलिकोप्टरबाटै लगिएको छ ।

धादिङको मौवाखोलामा हिजो बाढी तथा पहिरोले पुल नै भत्काएपछि सडक अवरुद्ध बनेको हो । सडक खुलाउने प्रयास अहिले पनि चलिरहेकै छ ।