अपहरणको नाटक गर्ने शक्ति युवतीसँग होटलमा भेटिए

७ साउन, काठमाडौं । प्रहरीले अपहरण गरेको भन्दै नाटक गर्ने व्यक्तिलाई प्रहरीले पक्राउ गरेको छ । महानगरीय अपराध महाशाखाले काठमाडौं महानगरपालिका ४ बस्ने ३० वर्षीय शक्तिराज रेग्मीलाई पक्राउ गरेको हो ।

असार २४ गतेदेखि हराएको र अपहरणमा परेको हुन सक्ने भन्दै उनकी श्रीमतीले प्रहरीमा उजुरी दिएकी थिइन् । उजुरी पाएपछि खोजीमा लागेको प्रहरीले अनुसन्धान गर्दा उनी होटलमा फेला परेका हुन् ।

घरबाट निस्किएर सम्पर्कविहीन भई नयाँ बसपार्कस्थित सुगन्ध होटलमा युवतीसँग बसिरहेका उनलाई प्रहरीले पक्राउ गरेको हो । घरजग्गा कारोबारी रेग्मी विभिन्न व्यक्तिबाट लिएको करोडौ पैसा दिन नपरोस भनेर अपहरणको नाटक गरेका थिए ।