तीन जनालाई कोरोना देखिएपछि स्याङ्जा प्रहरी कार्यालय शिल

७ साउन, स्याङ्जा । तीन जना प्रहरीमा कोरोना संक्रमण देखिएपछि जिल्ला प्रहरी कार्यालय स्याङ्जा सिल गरिएको छ । कोरोना संक्रमणको जोखिमलाई मध्यनजर राख्दै सर्वसाधरण तथा सेवाग्राहीलाई कार्यालय प्रवेशमा रोक लगाएर सिलकै अवस्थाअनुसार सुरक्षा सतर्कता अपनाइएको जिल्ला प्रहरी कार्यालय स्याङ्जाका डीएसपी राजेन्द्रप्रसाद अधिकारीले बताए ।

तीनजना प्रहरी कर्मचारीमा मंगलबार संक्रमण पुष्टि भएको छ । उनीहरुमा सामान्य रूघाखोकी देखिएपछि साउन ४ गते कोरोना परीक्षणका लागि स्वाब संकल गरिएको थियो । रुघाखोकीका लक्षण देखिएपछि उनीहरुलाई छुट्टै बस्ने व्यवस्था गरिएको छ । संक्रमण देखिएका तीनै जनालाई पुतलीबजार नगरपालिका–११ स्थित आइसोलेसन वार्डमा पठाइएको छ ।

कार्यालयमा झण्डै ८५ जना प्रहरी कर्मचारी कार्यरत छन् । डिएसपी अधिकारीका अनुसार सबै जनाको कोरोना परीक्षणका लागि बुधबारदेखि नै स्वाब संकलको काम भइरहेको छ । कार्यालयले कुनै उजुरी दिनुपरेमा इमेल गर्न आग्रह गरेको छ ।