प्रेमिकाले अर्कैलाई मन पराउन थालिन, पूर्वप्रेमीले एसिड प्रहार गरे

९ साउन, काठमाडौं । बिहीबार काठमाडौंको सीतापाइलामा युवतीलाई एसिड प्रहार गर्ने दुई जना पक्राउ परेका छन । युवतीले अर्कैलाई मन पराउन थालेपछि युवाहरुले युवतीलाई एसिड हान्न लगाएको पनि पाइएको छ । युवतीको किर्तिपुर अस्पतालमा उपचार भइरहेको छ ।

काठमाडौं प्रहरी परिसर र महानगरीय अपराध अनुसन्धान महाशाखाको टोलीले दुवै जनालाई डल्लुबाट पक्राउ गरेको हो । पक्राउ पर्नेमा रौतहटको लक्ष्मीपुर घर भई हाल डल्लु बस्ने मोहम्मद आलम र भारत घर भई डल्लुमा कालीगढको काम गर्ने मुन्ना मोहम्मद छन् ।

शुक्रबार बिहानै भाग्ने योजना बनाएका उनीहरुलाई प्रहरीले बिहीबार राती नै पक्राउ गरेको हो । ट्वाइलेट–बाथरुम सफा गर्ने एसिड प्रहार गरेपछि उनीहरुको खोजी भइरहेको थियो । प्रहरी सिसीटिभी फूटेजका आधारमा पक्राउ परेका उनीहरुमाथि थप अनुसन्धान भइरहेको प्रहरीले जनाएको छ ।