पूर्वरथी कूलबहादुर खड्काको निधन

१३ साउन, काठमाडौं । नेपाली सेनाका पूर्वरथी कुलबहादुर खड्काको निधन भएको छ। मंगलबार नर्भिक अस्पतालमा उपचारका क्रममा खड्काको निधन भएको हो ।

सैनिक प्रवक्ता सन्तोषवल्लभ पौडेलका अनुसार प्यान्क्रियाजको क्यान्सरबाट ग्रसित भएका खड्काको ६९ वर्षको उमेरमा मृत्यु भएको हो । खड्काको मंगलबार साँझ नै पशुपति आर्यघाटमा अन्त्येष्टि गरिने भएको छ ।

२००८ सालमा लम्जुङमा जन्मिएका खड्का २०२७ सालमा नेपाली सेनामा भर्ती भएका थिए। २०६६ सालमा तत्कालीन प्रधानमन्त्री पुष्पकमल दाहाल प्रचण्डले प्रधानसेनापति रुक्मांगत कट्वाललाई बर्खास्त गरेर खड्कालाई प्रधानसेनापति नियुक्त गरेका थिए ।

तर तत्कालीन राष्ट्रपति रामवरण यादवले खड्काको नियुक्तीलाई अनुमोदन गरेनन् । उल्टै कट्वाललाई नै प्रधानसेनापतिमा थमौती दिएका थिए । तत्कालिन राष्ट्रपति यादवले सरकारले बर्खास्त गरेको सेनापतिलाई थमौति दिएर निर्वाचित सरकारमाथि हस्तक्षेप गरेको भन्दै प्रचण्डले प्रधानमन्त्री पदबाट राजीनामा दिएका थिए । प्रचण्डको राजीनामासँगै खड्काले सेनापतिमा नियुक्त भएपनि पद बहाली गर्न सकेनन् ।