कमलादीको सुनचाँदी बरामदको घटनामा छानबिन गर्न विशेष समिति गठन

१४ साउन, काठमाडौं । केही दिनअघि कमलादीबाट बरामद भएको साढे १४ किलो चाँदी र आधा किलो सुनका विषयमा छानबिन गर्न विशेष समिति गठन गरिएको छ ।

प्रहरीले सुन बोकेको गाडीलाई फ्लो गरेपछि सुन तस्कर गाडी छाडेर भागेको घटनापछि अनियमितता भएको हुन सक्ने आशंकामा अनुसन्धान गर्न प्रहरीले छानविन समिति गठन गरेको हो ।

महानगरीय अपराध अनुसन्धान महाशाखाका प्रमुख एसएसपी दिपक थापाको नेतृत्वमा गठित समितिले अनुसन्धान गर्नेछ । महानगरीय प्रहरी कार्यालय, रानीपोखरीका प्रमुख डीआईजी विश्वराज पोखरेलले प्रहरी अधिकारीमाथि प्रश्न उठेपछि छानविन समिति गठन गरिएको बताए ।

समितिमा एसएसपी किरण बज्राचार्य, एसपी सोमेन्द्रसिंह राठौर, डीएसपी दुर्गा दाहाल र राजकुमार केसी छन् । प्रहरीले सुन रहेको गाडी पछ्याउन थालेपछि तस्करले सुन छाडेर भागेका थिए ।

तस्करलाई भगाउन प्रहरी नै सक्रिय भएको आरोप लागेपछि प्रहरीले छानबिन समिति गठन गरेको हो ।