अभियुक्तले नै प्रहरीलाई सुन दिएर भागेको खुलासा

१६ साउन, काठमाडौं । १५ किलो सुन भनिएको कमलादी प्रकरणमा नयाँ नयाँ तथ्य बाहिर आउन थालेका छन् । कमलादीबाट प्रहरीले बरामद गरेको भनिएको सुन अभियुक्तले फालेको नभई जवानलाई दिइएको पाइएको छ ।

दरबारमार्ग प्रहरी प्रमुख डीएसपी रञ्जनकुमार दाहाललाई समेत गलत सूचना दिएर प्रहरी जवान बहादुरसिंह कडायतले सुन्धारामा सुन लिएका थिए । एसएसपी सुशीलकुमार यादव नेतृत्वको छानविन समितिले दरबारमार्ग प्रहरीको सीआरभी टोलीका चालक कडायतलाई हातमा सुन दिइएको जनाएको छ ।

घटनामा पक्राउ परेका तीन अभियुक्तले कडायतलाई सुन दिएको बताएपछि नयाँ तथ्य बाहिर आएको हो । जवान कडायत लामो समय लाजिम्पाट विटमा काम गरेका थिए । त्यहीँ उनको जेम एण्ड ज्वलरी पसलका सञ्चालक कौशल पटेलसँग चिनजान भएको थियो । पटेल तिनै हुन्, जसले अवैध १५ किलो सुन आउँदैछ भन्ने सूचना कडायतलाई दिएका थिए ।

कडायतले यो सूचना दरबारमार्ग प्रहरीका घुमुवा प्रसन श्रेष्ठलाई दिएका थिए । र, श्रेष्ठले डीएसपी दाहालसम्म यो सूचना पुर्याएका थिए ।

उनलाई प्रहरीले मंगलबारै पक्राउ गरिसकेको छ । घटनामा संलग्न भएका आरोपमा पूर्वी नवलपरासीबाट पक्राउ परेका देवान पटेलका उनी भाइ समेत हुन् । सुन छाडेको नभई अभियुक्तले नै मिलेमतोमा सुचना लुकाएर दबाउन खोजिएको पाइएको छ ।

घटनाबारे थप अनुसन्धान भइरहेको र दरबारमार्गका प्रहरीमाथि थप आशंका बढाएको छ ।