ओली–प्रचण्ड वार्ता भोलि पनि !

१८ साउन, काठमाडौं । आज झण्डै तीन घण्टा छलफल हुँदा पनि निष्कर्षविहिन नेकपाका अध्यक्षद्धय केपी शर्मा ओली र प्रचण्डबीच भोलि पनि वार्ता हुने भएको छ । भोलि बिहान फेरि बस्ने गरी आजको वार्ता सकिएको नेताहरुले बताएका छन् ।

ओली र प्रचण्डबीचको वार्ता आज दिउँसो बालुवाटारमा बसेको थियो । जसलाई वरिष्ठ नेता झलनाथ खनाल र स्थायी कमिटी सदस्य सुवासचन्द्र नेम्वाङले मध्यस्तता गरेका थिए । एक हप्तापछि तीन घण्टा लामो छलफल सकारात्मक भएपनि ओली र प्रचण्डबीच सहमति जुटिसकेको छैन् ।

प्रचण्डले प्रधानमन्त्री र अध्यक्ष पदबाट ओलीको राजीनामा माग गरेका छन् । ओलीले कुनै हालतमा राजीनामा नदिने बताउँदै आएका छन् । अहिले चलिरहेको स्थायी कमिटी बैठक समेत बेवास्ता र बहिष्कार गरिरहेका ओलीले संसद अधिवेशन अन्त्य गरिसकेका छन् । ओलीको पछिल्लो कार्यशैलीबाट नेकपाका नेताहरु झन रुष्ट बनेका छन् ।