वीरगञ्जमा थप ७३ जनालाई कोरोना, सेना, प्रहरी र पत्रकार पनि संक्रमित

१९ साउन, वीरगञ्ज । प्रहरी, सेना र पत्रकारसहित पर्साका थप ७३ जनामा कोरोना भाइरसको संक्रमण भएको छ । वीरगञ्जको नारायणी अस्पताल प्रयोगशालामा गरिएको परीक्षणमा थप ७३ जनालाई संक्रमण पुष्टि भएको हो ।

संक्रमित हुनेमा दुई जना प्रहरी, एक सेना, एक जना पत्रकार, वीरगञ्ज महानगरपालिकाका विभिन्न वडाका पाँच जना, बारा जिल्लाका पाँच जना र भारतीय नागरिक एक जना छन् । योसँगै पर्सामा संक्रमितको संख्या ५ सय ८० पुगेको छ ।

संक्रमित र मृतकको संख्या बढ्न थालेपछि पर्सामा जिल्लाभर नै निषेधाज्ञा जारी गरिएको छ । साउन १० देखि वीरगञ्ज महानगर क्षेत्रभित्र मात्रै जारी गरिएको निषेधाज्ञा जिल्लाभर विस्तार गरिएको हो ।

पछिल्लो समय कोरोना सक्रमितमध्ये केहीको मृत्यु हुन थालेपछि वीरगञ्जमा त्रास समेत बढेको छ । पछिल्लो एक महिना मात्रै वीरगञ्जमा १३ जनाको मृत्यु भइसकेको छ । कोरोनाबाट वीरगञ्जका मेयर विजय सरावगी, सांसद प्रदीप यादव समेत संक्रमित छन् ।