कमलादी सुनकाण्ड छानबिन समितिको प्रतिवेदन : डीएसपी रञ्जनलाई उन्मुक्ति !

२२ साउन, काठमाडौं । कमलादीबाट बरामद भएको सुनकाण्डमा अध्ययन गर्न गठित छानबिन समितिले प्रतिवेदन बुझाएको छ । तर सुन प्रकरणमा गम्भीर लापरबाही गर्ने प्रहरीलाई विभागीय कारबाहीको सिफारिस प्रतिवेदनमा नगरिएको पाइएको छ ।

कमलादीबाट १५ किलो सुन भनेर केही समयअघि बरामद भएको धाँतु साढे १४ किलो चाँदी रहेको पाइएको थियो । आधा किलो मात्रै सुन भेटिएको कमलादी प्रकरणले प्रहरीको लापरबाही मात्रै होइन, काठमाडौँमा सुन कसरी तस्करी भइरहेको छ ? भन्ने घटनाक्रम देखाएको थियो ।

सुनकाण्ड प्रकरणमा पनि दरबारमार्गका तत्कालीन प्रहरी नायब उपरीक्षक डीएसपी रञ्जन दाहालकाे लापरबाही भएको देखिएको थियो । सोही प्रकरणपछि उनको सरुवा भएको थियो । छानबिन समितिले विभागीय कारबाही आवश्यक नभएको निष्कर्ष निकालेको छ ।

महानगरीय प्रहरी कार्यालयका प्रमुख विश्वराज पोखरेलले भने प्रतिवेदन आइसकेकाले हेडक्वार्टरमा बुझाउने तयारी भइरहेको बताए । प्रतिवेदन पाएपछि हेडक्वार्टरले नै कारबाही गर्ने उनको भनाई छ । प्रहरीले १३ साउनमा काठमाडौंको कमलादीबाट १५ किलो सुन जस्तो देखिने पहेँलो धातु बरामद गरेको र अभियुक्त फरार भएको सार्वजनिक गरेको थियो ।

तर यो घटनामा प्रहरीकै लापरबाही देखिएपछि हेडक्वार्टरले प्रहरी वरिष्ठ उपरीक्षक एसएसपी शुशीलकुमार यादवको नेतृत्वमा समिति बनाएको थियो । समितिले अध्ययन अनुसन्धान गरेपछि आज प्रतिवेदन बुझाएको हो ।