सोल्टी होटलको १५ प्रतिशत बोनस शेयर खातामा जम्मा

२६ साउन, काठमाडौं । सोल्टी होटल लिमिटेडले १५ प्रतिशत बोनस शेयर सम्बन्धित सेयरधनीको डिम्याट खातामा जम्मा गरिदिएको छ । होटलले गत मंसिर २३ गतेसम्म कायम रहेका शेयरधनीको खातामा बोनस शेयर खातामा पठाइदिएको हो । अहिलेसम्म पनि डिम्याट खाता नखोलेका शेयरधनीले खातामा बोनस शेयर पाउनका लागि पहिला आफूसँग भएको भौतिक प्रमाणपत्र डिम्याट गर्नुपर्नेछ । डिम्याट खाता नहुनेहरुको डिम्याट खाता खोलेपछि मात्र बोनस जम्मा गरिने होटलले जनाएको छ ।

सोल्टीको पुस २४ गते सम्पन्न सभाले गत आर्थिक वर्षको नाफाबाट १५ प्रतिशत बोनस शेयर र ११.३१५ प्रतिशत नगद लाभांश वितरण गर्ने प्रस्ताव पारित गरेको थियो । आज साउन २६ गते होटल सोल्टीको शेयर १६१ रुपैयाँमा कारोबार भईरहेको छ ।