यस बर्ष सबैभन्दा धेरै धान रोपाई

२८ साउन, काठमाडौं । यस वर्ष पछिल्लो पाँच वर्ष यताकै सबैभन्दा धेरै क्षेत्रफलमा रोपाइँ भएको छ । कृषि तथा पशुपन्छी विकास मन्त्रालयले कुल धान रोपाइँ हुने क्षेत्रफलको ९८ दशमलव १९ प्रतिशत भूभागमा धान रोपाई भएको जनाएको हो ।

मन्त्रालयका सहसचिव एवं प्रवक्ता हरि बहादुर केसीका अनुसार गत वर्ष कुल क्षेत्रफलको ९७ दशमलव ९३ प्रतिशत भू भागमा रोपाइँ भएको थियो । यस बर्ष देशभर रोपाइँ योग्य १३ लाख ७१ हजार ७०६ हेक्टर क्षेत्रफल मध्ये १३ लाख ४६ हजार ९ सय २० भूभागमा रोपाइँ सकिएको हो ।

यस वर्ष सबैभन्दा धेरै सुदूरपश्चिम प्रदेशमा ९९ दशमलव ८६ प्रतिशत भूभागमा रोपाइँ भएको छ भने प्रदेश एकमा सबैभन्दा कम ९५ दशमलव ८८ प्रतिशत क्षेत्रफलमा रोपाइँ भएको छ । समयमै रोपाइँ हुँदा धानको उत्पादन बढ्ने कृषिविज्ञहरुको भनाई छ ।