धितोपत्र बोर्डबाट अनुमतिप्राप्त संस्थाले सबै कर्मचारीको ३ दिनभित्र अनिवार्य कोरोना बीमा गराउनु पर्ने

१ भदौ, काठमाडौं । धितोपत्र बोर्डबाट अनुमतिप्राप्त सबै संस्थाले आफ्ना कर्मचारीको ३ दिनभित्र अनिवार्य कोरोना बीमा गराउनु पर्ने भएको छ । बोर्डले हिजो एक सुचना जारी गर्दै सो निर्देशन दिएको हो । धितोपत्र बोर्डले कोरोना बीमा तथा विदा सम्बन्धमा बोर्डबाट अनुमतिप्राप्त धितोपत्र बजार, क्रेडिट रेटिङ्ग संस्था तथा सम्पूर्ण धितोपत्र व्यवसायीहलाई परिपत्र गरेको छ ।

उप–कार्यकारी निर्देशक रुपेश केसीले जारी गरेको पत्रमा भनिएको छ :- विश्वव्यापी महामारीको रुपमा फैलिएको नोबेल कोरोना भाइरसबाट उत्पन्न हुन सक्ने जोखिमको आर्थिक सुरक्षण प्रदान गर्न तहाँको संचालक तथा कार्यरत सम्पूर्ण कर्मचारीहरुको अनिवार्य रुपमा संस्थानकै खर्चमा तीन दिनभित्र कोरोना बीमा गरी सो को जानकारी बोर्डमा पेश गर्न भनेको छ । नेपाल सरकारको मापदण्ड बामोजिम कुनै कर्मचारी क्वारेन्टाइन वा आइशोलेशनमा बस्नु परेमा संस्थालाई जानकारी गराई विदामा बस्न सक्ने छ । त्यसरी बिदा बस्दा निजलाई सो अवधिको तलब कट्टा नहुने गरी विदा दिने व्यवस्था गर्न पनि बोर्डले भनेको छ ।