विद्यार्थी नेता रिहाईको माग गर्दै धौलागिरी क्याम्पसमा नेविसंघको तालाबन्दी

१ भदौ, बागलुङ । नेपाल विद्यार्थी संघले धौलागिरी क्याम्पसमा अनिश्चितकालिन तालाबन्दी गरेको छ । विभिन्न विश्वविद्यालयमा रिक्त रहेका पदाधिकारीलाई नियुक्त गर्न र आफ्नो विद्यार्थी नेताको रिहाईको माग गर्दै नेविसंघले क्याम्पसमा तालाबन्दी गरेको हो ।

विश्वविद्यालयमा पदाधिकारी नियुक्ती, विना कारण थुनामा रहेका विद्यार्थीलाई रिहाई गर्नुपर्ने, हिजोदेखि बढेको पेट्रोलियम पदार्थको मूल्य फिर्ता लिनुपर्ने माग गर्दै नेविसंघले धौलागिरी बहुमुखी क्याम्पसमा तालाबन्दी गरेको हो ।

नेविसंघ बागलुङका सचिव श्रीकृष्ण पौडेल, स्ववियु सभापति मनिष थापा मागर, सचिव विष्णुराज पौडेल, प्राविधिक विद्यार्थी परिषदका केन्द्रिय उपाध्यक्ष सुजन सापकोटा लगायतले क्याम्पसको गेटमा पुगेर तालाबन्दी गरेका हुन् ।

त्रिभुवन विश्वविद्यालयमा विभिन्न माग राख्दै आन्दोलन गरिरहेका विद्यार्थी थुनामा पर्नु, पूर्वाञ्चल विश्वविद्यालय, संस्कृत विश्वविद्यालय, कृषि तथा वन विश्वविद्यालयमा पदाधिकारी नियुक्ती नगरिएको भन्दै क्याम्पसमा तालाबन्दी गर्नुपरेको नेविसंघका क्याम्पस सभापति दिनेश पन्तले बताए ।

आफ्ना माग तत्काल सम्बोधन नगरिए थप कडा आन्दोलन गर्ने पनि नेविसंघ बागलुङका सचिव श्रीकृष्ण पौडेलले चेतावनी दिएका छन् ।