प्रधानमन्त्री ओलीलाई थापाको पत्र : कोरोना नियन्त्रण गर्न नसके अवस्था भयावह हुनसक्ने चेतावनी

२ भदौ, काठमाडौं । पूर्व स्वास्थ्यमन्त्री गगन थापाले कोरोना भाइरस महामारीको मिलेर सामना गर्नुपर्ने बताएका छन् । प्रधानमन्त्री केपी शर्मा ओलीलाई पत्र लेख्दै कांग्रेस युवा नेता थापाले कोरोना महामारीको मिलेर सामना गर्नुपर्ने भन्दै तत्काल यसको नियन्त्रणका लागि निर्णायक कदम चाल्न माग गरेका हुन् ।

ओलीको मपाईत्वका कारण कोरोना नियन्त्रण बाहिर गइसकेको भन्दै थापाले तत्काल यसलाई नियन्त्रण गर्न नसके अवस्था भयावह हुनसक्ने चेतावनी पनि दिएका छन् ।

‘सरकारले अलिकति पनि संवेदनशीलता देखाइदिएको भए यो क्रमलाई रोक्न सकिन्थ्यो । संक्रमितको पहिचान, आइसोलेसन, कन्ट्राक्ट ट्रेसिङ, टेस्टिङ र उपचार पद्धतिलाई चुस्त बनाएर समयमा नै काम गरेको भए स्थिति नियन्त्रणमा रहन्थ्यो’, पत्रमा उल्लेख छ।

थापाले प्रधानमन्त्री केपी शर्मा ओलीले ‘स्टेट अफ इमर्जेन्सी’को अनभूति नगरेसम्म अन्य व्यक्ति कराएर केही नहुने बताएका छन् । उनले जनताको जीवन रक्षालाई पहिलो प्राथमिकतामा नराखेर पार्टीको किचलोमा समय खर्चेकोमा आपत्ति जनाएका छन्। संक्रमितको संख्यामा तीव्र वृद्धि भएको जनाउँदै थापाले देशभर एकै खाले रणनीतिले प्रभावकारिता ल्याउन नसक्ने बताएका छन् ।

हटस्पटमा कम्तिमा दुई साता जनस्वास्थ्य आपतकाल घोषणा गर्न प्रधानमन्त्रीलाई सुझाएका छन् । युद्धस्तरमा कार्य गर्नुपरेको सुझाउँदै नेता थापाले विगतमा जस्तै प्रभावहीन बनि बालुवाटामा नसुत्न प्रधानमन्त्रीलाई भनेका छन्। परीक्षणको दर बढाउन आग्रह गर्दै थापाले जसले परीक्षण गर्नै पर्ने हो तिनले नपाउने विधि अन्त्य गर्न सुझाएका छन्।