कांग्रेस कोटाबाट अख्तियारमा चन्द वा रेग्मीको सम्भावना

३ भदौ, काठमाडौं । कोरोना कहरले फेरि आक्रान्त नेपालको जनजीवन ठप्प हुन थालेको छ । संक्रमित संख्या तीव्र गतिमा बढ्न थालेको छ । सत्ताधारी दलभित्रको अन्तद्र्वन्द्व भने विस्तारै उत्कर्षबाट उँधो झर्न थालेको छ । यसका लागि शीर्ष नेताहरुले पनि प्रधानमन्त्री केपी ओलीले मात्रै प्रयोग गरेको राजकीय तुजुक अर्थात सत्ता साझेदारी गर्ने सहमति भएको हो ।

विगत पाँच महिनादेखि चर्किएको विवादको अन्त्य गर्ने अस्त्रका रुपमा सत्तामा भागबण्डा बनाइएको छ । त्यसैलाई मूर्तरुप दिन नेतात्रयको प्रतिनिधि सम्मिलित ६ सदस्यीय कार्यदल नै बनाइएको छ । कार्यदलको क्षेत्राधिकार भनेको सत्तामा ओलीको एकलौटी अन्त्य गरी भागबण्डा गर्नु नै रहेको छ । भागबण्डामा मन्त्रिमण्डल हेरफेरदेखि मुख्यमन्त्री बदलीसम्म परेको छ । साथै, रिक्त संवैधानिक पदहरुमासमेत भागबण्डाको तयारी भइरहेको छ ।

त्यसमा पनि अख्तियार दुरुपयोग अनुसन्धान आयोग सबैको चासोको केन्द्रमा रहेको छ । लामो समय कुरा नमिल्दा ओलीले संवैधानिक निकायको नियुक्ति प्रक्रिया रोकेर राखे । अब भागबण्डाको सहमति भएकाले फेरि नियुक्ति प्रक्रिया अगाडि बढाउने तयारी थालेका छन् ।

यस प्रयोजनका लागि ओलीले प्रमुख प्रतिपक्षी दल नेपाली कांग्रेसका सभापति शेरबहादुर देउवासँग पनि छलफल गरिसके ।
सम्भवत आउने साता ओलीले संवैधानिक परिषदको बैठक राख्दैछन् । अन्य निकायका पदाधिकारी भन्दा अख्तियार सबैको चासो बन्नुमा यसको कार्यक्षेत्र नै मुख्यकारण हो । भ्रष्ट्राचार र अनियमितताको सन्दर्भमा यो निकायले छानविन गर्न पाउने भएकाले पनि नेताहरुको रोजाई यो निकाय हुने गरेको छ ।

पाँच जना आयुक्त र एकजना प्रमुख गरि ६ जना रहने आयोगमा अहिले तीन सदस्य मात्र रहेका छन् । प्रमुख आयुक्त नवीनकुमार घिमिरे पनि यही भदौ २९ मा उमेर हदले अवकाश हुनेवाला छन् । बाँकी दुई जनामा डा.गणेशराज जोशी र सावित्री थापा गुरुङ रहने अवस्था छ । त्यसैले अहिले तीन जनाको सिफारिश गरिहाल्न ओली हतारिएका हुन् ।

यसबारे छलफल गर्न बोलाइएको अनौपचारिक वैठकमा प्रतिपक्षी दलका नेता देउवाले अख्तियारमा दावी प्रस्तुत गरेको निकट स्रोतले बताएको छ । प्रचण्डकोसमेत उपस्थितिमा गत साता भएको छलफलमा तीनै जनाले अख्तियारमा दावी प्रस्तुत गरे । तर ओलीले भने नेकपाकै तीनजना नेताको भागमा अख्तियारको कोटा रहने बाध्यता रहेको पनि उनले देउवालाई बताएका थिए ।

माधवजी (वरिष्ठ नेता माधवकुमार नेपाल ) ले समेत अख्तियारमा दावी गर्नुभएकाले अन्य निकायमा मात्रै कांग्रेसलाई भाग दिन सकिने भन्दै उनले देउवालाई मनाउन खोजे । तर देउवाले अख्तियारमा आफ्नो मान्छे हुनैपर्ने अडान दोह¥याए ।
स्रोत भन्छ– त्यसो भए तपाईंको मान्छेको नाम दिनोस् त भन्दै ओलीले नाम मागे । जवाफमा देउवाले जयबहादुर चन्दको नाम दिए ।

मन्त्रीपरिषदद्धारा आईजीपीमा नियुक्त भइसकेका चन्द सर्वाेच्च अदालतको चलखेलपूर्ण आदेशपछि फुली लगाउनबाट बञ्चित भएका थिए । उनीमाथि अन्याय भएको छ भन्दै देउवाले चन्दलाई नै अख्तियारमा पठाउने अडान लिए । तर प्रधानमन्त्री ओलीले भने चन्दको नाम स्वीकारेनन् । विकल्पमा नाम दिन उनले आग्रह गरे । कांग्रेस कोटामा योग्यता पुग्ने जोसुकै व्यक्ति सिफारिश गर्न पाउनुपर्ने भन्दै देउवाले ओलीको प्रतिवाद गर्न खोजेको स्रोतले बताएको छ ।

तर ओलीले चन्दको विकल्पमा एउटा नाम सुझाउन आग्रह गरेपछि देउवाले राष्ट्रिय अनुसन्धान विभागका पूर्वप्रमुख दीलिप रेग्मीको नाम दिए । रेग्मी पनि ओली प्रधानमन्त्री भएपछि ०७५ मा तीन बर्षे कार्यकाल लगाएर निकाला परेका व्यक्ति हुन् । त्यसअघि चार वर्ष कार्यकाल रहेको भएपनि ओलीले रेग्मीलाई हटाउन तीन वर्षमा झारेका थिए । कांग्रेस कोटाबाट अख्तियारमा जाने सम्भावना यिनै दुईजनाको रहेको पनि देउवा निकट स्रोतले बताएको छ ।

ओलीका तर्फबाट भने पूर्व गृहसचिव प्रेमकुमार राई अख्तियार जाने भाग्यमानीमा पर्ने सम्भावना औंल्याइएको छ । भदौ ३० बाट डा.गणेशराज जोशीलाई प्रमुख बनाइने तयारी गरिएको छ । जोशी प्रचण्डको कोटाबाट सो पदमा पुगेका हुन् । उनी केही महिनापछि अवकाश हुँदैछन् । त्यसपछि भने राईलाई प्रमुख आयुक्त बनाउने ओलीको योजना रहेको छ ।