शेयरबजार खुला हुने भएपछि लगानीकर्ता उत्साहित

३ भदौ, काठमाडौं । अर्थ मन्त्रालय्, धितोपत्र बोर्ड र नेपाल स्टक एक्सचेन्ज शेयर बजार खोल्ने पक्ष उभिएसँगै लगानीकर्ता उत्साहित भएका छन् । नेपाल धितोपत्र बोर्डले भाेलिबाट लागूहुने निषेधाज्ञा अवधिमा पनि शेयरबजार नियमित रुपमा खोल्ने र कारोबार हुने जनाएको छ ।

आज अर्थमन्त्रालयमा भएको छलफलपछि नेपाल धितोपत्र बोर्ड शेयरबजार खोल्ने निर्णयमा पुगेको हो । साविकको झैं बिहान ११ देखि दिउँसो ३ बजेसम्म बजार सञ्चालन हुने छ । यसअघि नेप्सेले पनि बजार नियमित रुपमा सञ्चालन हुने जानकारी गराएको थियो । कतिपय लगानीकर्ता बजार खुल्छ वा खुल्दैन भन्नेमा अन्योलमा पनि रहेका थिए तर बजार सञ्चालक र नियामक निकाय नेप्सेले कारोबार नियमित हुने बताएका छन् ।

नेप्सेको पछिल्लो तथ्यांक अनुसार अनलाइनबाट दोस्रो बजारमा शेयर कारोबार गर्ने लगानीकर्ताको संख्या ४७ हजार नाघेका छन् । दोस्रो बजारमा सक्रिय भएर शेयर कारोबार गर्ने लगानीकर्ताको संख्या २ लाख ६४ हजार ६३३ जना रहेको नेप्सेको तथ्यांकमा उल्लेख छ । सीडीएसको तथ्यांक अनुसार १७ लाख ७६ हजार ३३७ जनाको हितग्राही खाता (डिम्याट अकाउन्ट) रहेको छ । यसआधारमा अहिलेसम्म आफैंले पूर्णप्रविधि प्रयोग गर्ने लगानीकर्ताको संख्या भने न्यून रहेको देखिन्छ ।

धितोपत्र बोर्डका प्रवक्ता निरज गिरीका अनुसार निषेधाज्ञा अवधिमा पनि नेप्सेको कारोबार अहिलेकै जस्तै नियमित हुनेछन् । यता, बजार सञ्चालक तथा नियामक निकायहरुले पूर्ण अनलाइन प्रणालीको कारोबारलाई जोड दिएका छन् । ग्राहकहरु ब्रोकर कार्यालयमा जानुपर्ने बाध्यता छैन । कारोबार तथा भुक्तानीका कामहरु अनलाइन प्रणालीबाट सम्पन्न गर्न सकिन्छ ।

सरकारले आज भदौ ३ गते मध्यरातिदेखि भदौ १० गतेसम्म निषेधाज्ञा जारी गरेको छ । लगानीकर्ता पनि शेयरबजार बन्द गर्न नहुने पक्षमा उभिएका छन् । यसभन्दा पहिलेको लकडाउनमा नेप्से ९८ दिन बन्द भएको थियो । लामो समय बन्द भएका कारण लगानीकर्ताले शेयर खरिदबिक्री गर्न पाएका थिएनन् ।