विष्णु रिमालको फन्दामा ओली, महेश बस्नेतहरुको हरि बिजोग

४ भदौ, काठमाडौं । प्रधानमन्त्री केपी ओली हत्तपत्त कसैलाई विश्वासै गर्दैनन् । तर उनले विश्वास गरिसकेपछि भने उसको कुरा गलतै भएपनि स्वीकार्छन् । अहिले त्यसैको प्रभावले गाँजेको छ बालुवाटार परिसरलाई ।

ओली गुटकै एकजना प्रभावशाली नेताका अनुसार ओलीका अति नै विश्वासिला मध्ये हुन्– भक्तपुरका सांसद महेश बस्नेत । छोरा जत्तिकै पत्यारिला । तर पछिल्ला दिन महेशको बालुवाटार आवतजावत पातलो छ । किनभने उनीभन्दा बढी विश्वासिलाहरुले बालुवाटार घेरेका छन् । ती अति विश्वासिलाको नजरमा महेश कसिंगर बनेका छन् । ती पात्र हुन– प्रमुख राजनीतिक सल्लाहकार विष्णु रिमाल ।

ती नेताले नाम नबताउने शर्तमा नेपालबहसलाई बताए अनुसार रिमाल ओलीसँग अरुको हिमचिम बढेको सहन सक्दैनन् ।त्यसैले मन नपर्नेहरुसँग उनले पानी नै बार्ने गरेका हुन्छन् । सकेसम्म मन नपर्नेलाई उनी बालुवाटार प्रवेश नै गर्न बन्देज लगाउँछन् । कथं प्रवेश गरिहाल्यो भने पनि प्रधानमन्त्री ओलीसँग भेट गराउन अवरोध खडा गरिदिन्छन् । त्यही नियति महेशले पनि भोग्दै आएको उनको दावी छ ।

महेशले ओलीसँग भेट्नसमेत विष्णु रिमालको सहयोग लिनुपर्ने अवस्था आयो । कतिपल्ट भेट्न जाँदासमेत महेश घण्टौं कुर्ने तर रित्तो हात फर्कनुपर्ने परिस्थिति ब्यहोरे । प्रधानमन्त्रीसँग भेट्नै नपाएपछि उनी बालुवाटार जानै छाडे । पछिल्ला दिन महेशको ओलीसँगको भेट नै पालतो हुन थालेको ओली गुटभित्रै चर्चा हुने गरेको छ ।

ओली निकट स्रोतका अनुसार गएको वैशाखमा ओलीले दल बिभाजनसम्बन्धी अध्यादेश ल्याएका बेला समाजवादीका सांसद सुरेन्द्रकुमार यादवको अपहरण प्रकरणमा भने महेश फेरि विवादित बनेका थिए । सो प्रकरणमा पनि महेशलाई फसाउने काम प्रधानमन्त्रीका प्रमुख राजनीतिक सल्लाहकारले नै गराएका थिए । प्रधानमन्त्री ओलीलाई जनकपुरमा रहेका यादवले सम्पर्क गरी विभाजनमा सहयोग गर्ने वचन दिएका थिए । लगत्तै ओलीले महेशलाई फोन गरी यादवलाई बालुवाटार ल्याउन भने । तर यो प्रकरणमा सांसद् यादवले कुरा फेरे । अनि त्यसको दोष फेरि महेशकै थाप्लोमा गयो । त्यस्तो दुश्प्रचार गर्ने काम उनै रिमालबाट भएको सो स्रोतको भनाई थियो ।

त्यति मात्र होइन, ओली महेशलाई मन्त्री बनाउन चाहन्थे । पहिलो पटक नै ल्याउने चाहना थियो ओलीको । तर उनै रिमालले अहिले गोकुल बाँस्कोटालाई मात्रै बनाउँ, महेशलाई पछि बनाउँदा तपाईं आलोचित हुनबाट जोगिनुहुन्छ भन्ने सल्लाह दिए । त्यसैले गर्दा महेश मन्त्री हुनबाट बञ्चित भएको स्रोतले बताएको छ । पछि पछि त ओलीलाई नै भड्काउने तहसम्मको हरकत रिमालबाट हुन थालेको बुझाई महेशको छ । निकटवर्तीहरुसँग महेशले आफ्नो गुनासो गर्ने गरेका छन् ।तर ओलीसँगै अघिल्लो साता बालकोटस्थित घरमा भएको छोटो भेटघाट बाहेक मसिनो गरी कुरा भएको छैन महेशको ।
फेरि पनि महेश मन्त्री बन्ने हल्ला छ । सम्भवतः अर्काे साता हुने पुनर्गठनमा महेशलाई ल्याउने पक्षमा छन् ओली । तर रिमालको भूमिका कस्तो रहन्छ त्यसैमा भर पर्छ महेशको मन्त्री बन्ने सपना ।

सल्लाहकार रिमालको भूमिकालाई ओलीले नजरअन्दाज गरेभने अबको पुनर्गठनमा महेश मन्त्री हुनसक्ने अवस्था छ । तर रिमाल ओलीको सल्लाह काट्न सक्ने हैसियतमा भने कमजोर छन् । किनभने रिमाललाई राष्ट्रपति विद्यादेवी भण्डारीको पनि आशीर्वाद रहेको बताइन्छ । ओलीले अहिले रिमालको कुरा बढी सुन्नुको प्रमुख कारण पनि त्यही हो । प्रधानमन्त्री ओलीको सबैभन्दा निकट सल्लाहकार टीममा रक्षामन्त्री ईश्वर पोखरेललगायत रिमालहरु रहेका छन् ।

त्यसैले अब हुने पुनर्गठनमा पनि महेशको भाग्य खुल्छ खुल्दैन त्यसै भन्न सक्ने अवस्था छैन । व्यक्तिगत रिसइबी साँध्ने स्वभावका रिमालकै गलत सल्लाहले गर्दा ओली सरकार फेरि आलोचित भएको छ । त्यो हो प्रेस काउन्सिलमा भएको नियुक्ति र बर्खास्ती । प्रेस काउन्सिल ऐन, २०४८ विपरित ओली सरकारले कार्यवाहक अध्यक्षबाट पत्रकार किशोर श्रेष्ठलाई बर्खास्त गरी कानुन व्यवसायी दुर्गा भण्डारीलाई सो जिम्मेवारी दियो । तर सरकारको निर्णय कार्यान्वयमा आउन भने सकेन । हिजो नै सर्वाेच्च अदातलले सरकारको उक्त निर्णय कार्यान्वयन नगर्नू भन्ने आदेश दिएको छ ।

यो प्रकरणलाई विवादित बनाउने काम पनि उनै सल्लाहकार रिमालको इन्ट्रेस्टमा भएको बुझिएको छ । पत्रकार श्रेष्ठसँग व्यक्तिगत इबी साँध्न नै यस्तो निर्णय भएको स्रोतको दावी छ । वाम विचारका पत्रकार श्रेष्ठ नेकपालाई सहयोग गर्दै आएका व्यक्ति हुन् । तर उनी व्याबसायिक पत्रकारिताको पक्षमा खुलेर बहस गर्न उद्यत भएपछि ठेगान लगाउन यस्तो निर्णय गरिएको थियो ।

अब पनि ओलीले उनै रिमाललाई बोकेर हिंड्ने हो भने धेरै नेता कार्यकर्तासँगको सम्पर्क टुट्न सक्ने अवस्था छ । महेश र किशोर जस्ता सयौं नेता कार्यकर्तालाई सरकार विरोधी बनाउने काम रिमाल जस्ता सल्लाहकारबाट भइरहेको गुनासो ओली गुटकै नेता तथा कार्यकर्ताको छ ।