पूजारीका हत्यारालाई तत्काल पक्राउ गर्न गगन थापाको माग

६ भदौ, काठमाडौं । रौतहटमा पुजारीको हत्यारालाई तत्काल पक्राउ गरेर सार्वजनिक गर्न नेपाली कांग्रेसका नेता गगन थापाले माग गरेका छन् । प्रमुख प्रतिपक्षी नेपाली कांग्रेसका केन्द्रीय सदस्य एवं सांसद थापाले सामाजिक सञ्जाल ट्वीटरमा ट्वीट गर्दै पूजारीका हत्यारामाथि कारबाही गर्न माग गरेका हुन् ।

तीन दिनअघि रौतहटको माधवनारायण नगरपालिका–२ खेसहरिया टोलको हनुमान मन्दिरका पुजारी श्रीराम साहको अज्ञात समूहले गोली हानी हत्या गरेको थियो। मन्दिरमा रोटी खाइरहेका बेला उनीमाथि गोली प्रहार भएको थियो।

पुजारीको हत्या हुँदा एक शब्द नबोलेको भन्दै गगनको आलोचना भइरहेका बेला शनिवार विहान ट्वीटरमार्फत पुजारीका हत्यारामाथि कारवाही गर्न सरकारसँग माग गरेका हुन्। साथै उनले पूजारीको हत्या प्रकरणमा अनुसन्धान कहाँ पुग्यो ? भनेर नेपाल प्रहरीसँग पनि जवाफ माग गरेका छन् ।