नेकपामा देखिएको विवाद समाधान गर्न कार्यदलले बुझायो प्रतिवेदन

६ भदौ, काठमाडौं । नेपाल कम्युनिस्ट पार्टी ‘नेकपा’मा देखिएको विवाद समाधान गर्न गठित कार्यदलले प्रतिवेदन बुझाएको छ। शनिवार अध्यक्षद्वय केपी शर्मा ओली र पुष्पकमल दाहाल प्रचण्डलाई बालुवाटारमा कार्यदलले प्रतिवेदन बुझाएको हो।

कार्यदलले पार्टी विवाद समाधानका लागि मन्त्रिमण्डल पुनर्गठन, मुख्यमन्त्री हेरफेर र राजनीतिक नियुक्तिमा बाँडफाँडको मस्यौदासहितको प्रतिवेदन बुझाएको छ।

विवाद बढ्दै गएपछि ओली र प्रचण्डले गत शुक्रवार ६ सदस्यीय कार्यदल गठन गरेका थिए। सोमबारको सचिवालय बैठकले कार्यदललाई अनुमोदन गरेको थियो। महासचिव विष्णु पौडेलको संयोजकत्वमा रहेको कार्यदलमा शंकर पोखेल, भीम रावल, सुरेन्द्र पाण्डे, जनार्दन शर्मा र पम्फा भुसाल छन्।

सो प्रतिवेदन अध्यक्षद्वय ओली र प्रचण्डले छलफल गरी आगामी सचिवालय बैठकमा पेश गर्ने बताइएको छ । यही भदौ १ गतेको नेकपा सचिवालय बैठकले सो कार्यदल गठनलाई अनुमोदन गरी कार्यादेश स्पष्ट गरेको थियो ।

नेकपामा गत असार १० गते शुरु भएको स्थायी कमिटीमा नियमित कार्यसूचीका अतिरिक्त शक्ति बाँडफाँट र सरकार–पार्टीबीचको समन्वयबारे विवाद उत्पन्न भएकामा अब सहमतितिर ठोस पहल अघि बढेको नेताहरुले बताएका छन् ।