डाक्टर, नर्स र प्रहरीमाथिको आक्रमण बन्द गर्न लोहनीको आग्रह

७ भदौ, काठमाडौं । राष्ट्रिय प्रजातन्त्र पार्टीका अध्यक्ष डा. प्रकाशचन्द्र लोहनीले कोरोना महामारीको समयमा ज्यान जोगाउने स्वास्थयकर्मीमाथिको आक्रमणको भत्र्सना गरेका छन् । सामाजिक सञ्‍जाल फेसबुकमा स्टाटस लेख्दै उनले कोरोना महामारीमा अग्रपंक्तिमा खटिएका चिकित्सक, नर्स तथा अनय स्वास्थ्यकर्मी र प्रहरीमाथिको आक्रमण बन्द गर्न पनि आग्रह गरेका छन् ।

“यो कोरोना महामारीको समयमा हामीलाई बचाउन अग्रपंक्तिमा ठूलो जोखिम मोलेर लड्ने व्यक्तिहरु भनेको डाक्टर, नर्स, अन्य स्वास्थ्यकर्मी र प्रहरी तथा सेना र अन्य सुरक्षा निकाय हुन् । यस परिवेशमा स्वास्थकर्मीमाथि समय समयमा हमलाको खबर सबैको लागि दुखको कुरा हो’ उनले फेसबुकमा लेखेका छन् ।

‘श्रोत–साधनको अभाव भएको र सरकारी व्यवस्थापनमा अराजकता, भ्रष्टाचार र बेथिति देखिएको संकटको समयमा स्वास्थ्यकर्मीहरुमा कोरोना बिरामीहरुप्रति संवेदनशीलताको जनताले अपेक्षा गरेका छन् भने स्वस्थाकर्मीहरु प्रति हामीले सहयोग र निरन्तर सद्‌भाव कायम गर्नुपर्दछ । यो लडाई हामीले जित्‍नु पर्दछ । यसका लागि आक्रोशको सट्टा सहयोग र एक अर्काप्रति संवेदनशीलता अनिवार्य छ” लोहनीले भनेका छन् ।