स्वास्थ्य र सुरक्षाकर्मीलाई काम गर्ने वातावरण बनाउ : देउवा

७ भदौ, काठमाडौं । नेपाली कांग्रेसका सभापति शेरबहादुर देउवाले डाक्टर तथा सुरक्षाकर्मीमाथि आक्रमण हुनु दुखद भएको टिप्पणी गरेका छन् । साथै उनले कोरोना नियन्त्रणमा ‘फ्रन्ट लाइन’मा खटिएका स्वास्थ्यकर्मी र स्थानीय नागरिकबीच असमझदारी उत्पन्न हुन नदिन सरकारलाई आग्रह समेत गरेका छन् ।

आइतबार वक्तव्य निकालेर देउवाले कोरोना नियन्त्रणका लागि आफ्नो ज्यान जोखिममा राखेका स्वास्थ्यकर्मीसंगै सुरक्षाकर्मी, सञ्चारकर्मी र सफाईकर्मीहरुको सुरक्षा गर्न सरकारसँग माग गरेका छन् । स्वास्थ्यकर्मीहरुलाई अत्यावश्यक स्वास्थ्य सामग्रीको पर्याप्त ब्यवस्था गर्न र काम गर्न अत्यावश्यक सहज मनोवैज्ञानिक वातावरण खलल हुन नदिन सरकारलाई आग्रह गरेका छन् ।

‘कतिपय ठाउँमा स्वास्थ्यकर्मीलाई निरुत्साहित गर्ने प्रकृतिका घटना भएको सुन्नुपर्दा दुःख लागेको छ । स्वास्थ्यकर्मी र स्थानीय नागरिकबीच कुनै पनि प्रकृतिको असमझदारी र द्वन्द्व उत्पन्न हुन नदिन सतर्कताका लागि म तीनवटै तहका सरकारहरुलाई सजग गराउन चाहन्छु’ उनले भनेका छन् ।