ओली र प्रचण्डबीच प्रतिवेदनमाथि छलफल हुँदै, मन्त्रीमण्डल फेरबदलकाे तयारी

८ भदौ, काठमाडौं । गत शनिवार ६ सदस्यीय कार्यदलले बुझाएको प्रतिवेदनमाथि नेकपाका अध्यक्षद्वय केपी शर्मा ओली र पुष्पकमल दाहाल प्रचण्डले आजदेखि छलफल थाल्ने भएका छन् ।

अहिले केहीबेरमा प्रधानमन्त्रीसमेत रहेका ओली र प्रचण्डबीच  बालुवाटारमा छलफल हुन लागेकाे हाे । छलफलमा कार्यदलको १६ पन्ने लघु प्रतिवेदनले दिएका सुझावहरुलाई कार्यान्वयन गर्नेबारे दुई अध्यक्षबीच छलफलहुने बताइएकाे छ ।

विवाद सुल्झाउन गठित ६ सदस्यीय कार्यदलले एकसाता लामो गृहकार्यपछि शनिवार आफ्नो प्रतिवेदन अध्यक्षद्वयलाई बुझाएको थियो । नेकपामा विवाद चुलिएपछि स्थायी कमिटी बैठक पनि सुरु हुन सकेको छैन् । बैठकमा अधिकांश सदस्यहरुले प्रधानमन्त्री ओलीको राजीनामा मागेपछि विवाद झनै चर्किएको थियो ।

कार्यदलले ओलीले ५ नै वर्ष प्रधानमन्त्री र प्रचण्डले सम्पूर्ण कार्यकारी अधिकार लिएर पार्टी चलाउन सुझाव दिएको छ । त्यस्तै, कार्यदलले पार्टीलाई एकतावद्ध बनाउनुपर्ने कुरामा जोड दिएको छ।

कार्यदलका सदस्यहरुले आफूहरुले बुझाएको प्रतिवदेनले पार्टी विवाद सुल्झने दावी गर्दै आएका छन्। उक्त प्रतिवेदन ओली प्रचण्डको छलफलपछि सचिवालय बैठकमा पेश हुनेछ । सचिवालयमा छलफलपछि स्थायी कमिटीबाट पारित गरिने छ ।

आज हुने दुई अध्यक्षबीचको छलफलले तत्कालै सचिवालय बैठक बोलाउन सक्ने र सरकार हेरफेरका विषयमा छलफल हुने बताइएको छ । कार्यदलले आफ्नो छोटो प्रतिवेदनमा नक्शा प्रकाशन लगायतका विषयमा सरकारको प्रशंसा गरेको छ । साथै, महाधिवेशनसम्म केपी ओलीकै नेतृत्वमा सरकार सञ्चालन हुने तर केही मन्त्रीहरु हेरेफेर गर्ने कार्यदलको प्रस्ताव छ ।

प्रदेशमा पनि सरकारहरु हेरफेर गर्ने कार्यदलको प्रस्ताव छ । स्थानीय तहमा सरकार सञ्चालनका लागि पार्टीका तर्फबाट निर्देशिका जारी गरिनुपर्ने कार्यदलले सुझाव दिएको छ । पार्टीलाई सिस्टममा चलाउने र प्रधानमन्त्रीले महत्वपूर्ण निर्णयहरु गर्दा पार्टीको सल्लाहमा गर्ने भनिएको छ ।

आज दुई अध्यक्षबीचको छलफलपछि पार्टीमा र संसदीय दलमा निर्णय गराएर चाँडै नै केही मन्त्रीहरु हटाउनुका साथै केही मन्त्रीहरु थप गर्ने सम्भावना रहेको छ ।