काठमाडौंमा २८ हजारको परीक्षण गरिदै, संक्रमित १५ हजार पुग्ने !

८ भदौ, काठमाडौं । बढ्दो संक्रमणका क्रममा काठमाडौं उपत्यकामा कट्याक ट्रेसिङमा परेका झण्डै २८ हजारको परीक्षण गरिने भएको छ । काठमाडौं महागनरपालिकाले कट्याक ट्रेसिङमा परेका उनीहरुको परीक्षण थालिने बताएको हो ।

यससँगै अहिले बढ्दै गएको उपत्यकामा मात्रै कोरोना संक्रमितको संख्या १५ हजार पुग्ने अनुमान छ । सोमबार मात्रै काठमाडौं उपत्यकामा २२४ संक्रमित थपिएका थिए । पछिल्लो ८ दिनमा मात्र उपत्यकामा १५१९ संक्रमित थपिएका हुन् । संक्रमितको सख्ंया बढेसँगै ३ भदौबाट उपत्यकाका तीन वटै जिल्लामा निषेधाज्ञा जारी गरियो ।

निषेधाज्ञा जारी गरिएका बेला कट्याक ट्रेसिङमा परेका सबैको परीक्षण गर्ने महानगरको तयारी हो । यसले संक्रमण नियन्त्रण गर्न प्रभावकारी भूमिका खेल्ने महानगरको विश्वास छ । समूदायस्तरमै संक्रमण फैलिनसक्ने खतरालाई मध्यनजर गर्दै स्वास्थ्य मन्त्रालयसँग समन्वय गरेर कन्ट्याक्ट ट्रेसिङ र टेस्टिङको दायरा फराकिलो बनाइने काठमाडौं महानगरपालिकाका मेयर विद्यासुन्दर शाक्यले बताए ।

काठमाडौंँका १८ वटै पालिकामा तालिका बनाएर परीक्षण गरिने उनको भनाई छ । यो समाचार तयार पार्दासम्म काठमाडौं उपत्यकामा ३ हजार ४ सय ८६ जना कोरोना संक्रमित छन् ।

जसमा सबैभन्दा धेरै काठमाडौंमा २ हजार ७५६, ललितपुरमा ४ सय ४४ र भक्तपुरमा २ सय ८६ जना छन् । परीक्षणको दायरा बढाएमा उपत्यकामा संक्रमितको संख्या १५ हजार भन्दा धेरै पुग्ने विज्ञहरुको भनाई छ ।