आयल निगमको अमलेखगञ्ज डिपो र वीरगञ्जका ९ जनामा संक्रमण

९ भदौ, काठमाडौं । अमलेखगञ्ज डिपो र वीरगञ्ज कार्यालयका ९ जनामा कोरोना संक्रमण पुष्टि भएको छ । अमलेखगञ्ज डिपोमा कार्यरत ६ जना र मातहतको वीरगञ्ज कार्यालयमा कार्यरत ३ जनामा कोरोना संक्रमण पुष्टि भएको हो ।

नेपाल आयल निगमका प्रवक्ता विनितमणि उपाध्यायका अनुसार संक्रमणपछि दुई नम्बर प्रादेशिक डिपो अमलेखगञ्ज र वीरगञ्ज कार्यालय तीन दिनका लागि बन्द गरिएको छ । संक्रमित कर्मचारीलाई उपचारसहितको आसोलेसनमा राखिएको र संक्रमितको सम्पर्कमा रहेका दुवै कार्यालयका कर्मचारीहरुको पीसीआर परीक्षण गरेर काममा फर्काइने निगमले जनाएको छ ।

काठमाडौं, पोखरा, जनकपुर, बुटवलसहितका मुख्य सहरमा अमलेखगञ्ज डिपोबाट नै डिजेल–पेट्रोल वितरण हुन्छ । १९ सय किलोलिटर पेट्रोल र २० हजार किलोलिटर डिजेल भण्डार क्षमताको डिपो नेपाल–भारत पहिलो पेट्रोलियम पाइपलाइनसँग जोडिएको छ ।

मुख्य आपूर्ति प्रणालीमा नै प्रभाव पर्ने गरी संक्रमित फेला परेपछि निगमले थप मद्दत टोली काठमाडौंबाट पठाउने भएको छ । डिपो सञ्चालनका लागि १० जनाको टोली पठाउन लागिएको निगमले जनाएको छ ।