बाराका दुई जनाको वीरगञ्जमा मृत्यु

९ भदौ, वीरगञ्ज । कोरोना भाइरस संक्रमणबाट बाराका दुई जनाको मृत्यु भएको छ । पर्सा वीरगञ्जस्थित गण्डक कोभिड अस्पतालमा उपचारको क्रममा उनीहरुको मृत्यु भएको अस्पतालले जनाएको छ । कोरोनाले ज्यान गुमाउनेमा सुवर्ण गाउँपालिका–४ परशुरामपुरका ७२ वर्षीय र महागढीमाई नगरपालिका ४ दहियारटोल बस्ने ५९ वर्षीय पुरुष रहेका छन् ।

भदौ ६ गते कोरोना संक्रमण पुष्टि भएका ७२ वर्षीय वृद्ध घरमै आइसोलेसनमा थिए । स्वास्थ्यमा समस्या आएपछि भदौ ८ गते गण्डक कोभिड अस्पतालमा उपचारका लागि भर्ना गरिएको छ । उपचारकै क्रममा मंगलबार बिहान उनको मृत्यु भएको हो ।

त्यस्तै भदौ ४ गते कोरोना संक्रमण पुष्टि भएका महागढीमाइई नगरपालिकाका ५९ वर्षका पुरुष भदौ ५ गते गण्डक कोभिड अस्पतालमा भर्ना भएका थिए । दुवै तर्फ फोक्सोमा कडा खालको निमोनिया देखिएका उनलाई आईसीयूमा राखेर उपचार थालेपनि बिहान मृत्यु भएको अस्पतालले जनाएको छ ।

योसँगै वीरगञ्जमा कोरोनाबाट ज्यान गुमाउनेको संख्या ४१ पुगेको छ । पछिल्लो समय कोरोनाको हटस्पट बनेको वीरगञ्जमा पर्साका मात्रै ३० जनाको मृत्यु भएको छ ।