कञ्चनपुरमा उच्च ज्वरोले मृत्यु हुनेको संख्या ६ पुग्यो

११ भदौ, महेन्द्रनगर । कञ्चनपुरको महाकाली नगरपालिकामा उच्च ज्वरोका कारण मृत्यु हुनेको सख्या ६ पुगेको छ । यसअघि दिउँसोसम्म एक हप्तामा ४ जनाको मृत्यु भएको थियो ।

उच्च ज्वरो आएर मृत्यु हुनेमा माहाकाली नगरपालिका–५ का ६५ बर्षका गम्भीर सिंह भण्डारी, वडा नम्बर ४ का २१ बर्षका प्रेम चन्द, वडा नम्बर ३ का ३० बर्षका मान बहादुर सुनार, वडा नम्बर ६ की १४ बर्षकी पूजा बोगटी, वडा नम्बर ३ का ७५ बर्षका तुल सिंह थापा, वडा नम्बर ३ का ३८ बर्षका रतन बुढा मगर र वडा नम्बर १ का २५ बर्षका मोहन परियार रहेका छन् ।

मृतकहरु सबैमा १० दिन अघिदेखि १०३ डिग्रीसम्म ज्वरो आएको अस्पतालले जनाएको छ । स्थानीय दोधारा स्वास्थ्य केन्द्रमा उपचार हुन नसक्दा थप उपचारका लागि उनीहरुलाई कैलालीको धनगढीमा रहेको सेती अञ्चल अस्पताल पठाइएको यिो । तर उनीहरुको उपचारकै क्रममा मृत्यु भएको महाकाली नगरपालिकाका स्वास्थ्य शाखाका प्रमुख जय बहादुर महराले बताए ।

मृत्यु भएकामध्ये एक जनाको कोरोना परीक्षण गरिएको थियो । उनको रिर्पोट नेगेटिभ आएपछि अरुको पनि कोरोनाका कारण मृत्यु नभएको भन्दै अस्पताल तथा नगरपालिका पन्छिएको छ ।

उच्च ज्वरो आएकाले उनीहरु जापनीज ईन्सेफलाइटिसबाट संक्रमित भएर ज्यान गुमाएको हुन सक्ने अनुमान गरिएको छ । यद्यपी मृत्युको ठोस कारण भने अहिलेसम्म खुलेको छैन् । बिरामी भएका अरु २ जनको उपचार भइरहेको छ ।