देशभरका ७१ जना पत्रकारलाई संक्रमण पुष्टि

१२ भदौ, काठमाडौं । कोरोना संक्रमणबाट ग्रसित नेपालमा ७१ जना पत्रकार पनि संक्रमित भएका छन् । पत्रकारको छाता संस्था नेपाल पत्रकार महासंघले शुक्रबार विज्ञप्ती जारी गरेर सुदूरपश्चिमबाहेक ६ प्रदेशमा ७१ पत्रकार संक्रमित भएको जनाएको हो ।

सबैभन्दा धेरै प्रदेश २ मा २७ जना पत्रकार संक्रमित भएका छन् । पर्साका १३, बाराका ४, धनुषाका २, सप्तरीका ३, सर्लाहीका ३, महोत्तरीका १ र रौतहटका १ जना पत्रकार कोरोनाबाट संक्रमित भएका महासंघले जनाएको छ ।

यस्तै प्रदेश १ मा १३ जनामध्ये मोरङका १२ र उदयपुरका १ जना पत्रकार संक्रमित छन् । बागमती प्रदेशमा ११ जना पत्रकार संक्रमित भएकामा काठमाडौंका ९ र ललितपुरका २ जना छन् । यसैगरी गण्डकी प्रदेशमा कास्कीका १ र नवलपुरका ७ गरी ८ जना संक्रमित भएका छन् ।

प्रदेश ५ मा बाँकेका २, बर्दियाका १, कपिलवस्तुका ६ र रुपन्देहीका २ गरी ११ जना संक्रमित भएका छन् । कर्णालीको प्रदेशको दैलेखमा १ जना पत्रकारलाई कोरोना देखिएको छ । कोरोना महामारीको जोखिम थप बढेको भन्दै महासंघले सचेत रहन सबैलाई आग्रह गरेको छ ।