पाल्पा र वीरगञ्जमा दुई महिलाको मृत्यु

१३ भदौ, काठमाडौं । पाल्पा र वीरगञ्जमा कोरोना भाइरसको संक्रमणले दुई महिलाको मृत्यु भएको छ । पाल्पाको लुम्बिनी मेडिकल कलेजमा ३० बर्षीया महिला र वीरगञ्जको काेभिड-१९ अस्पतालमा ६५ बर्षीया महिलाको मृत्यु भएको हो ।

पाल्पको तानसेन नगरपालिका–८ मदनपोखराकी ३० वर्षीया महिलालाई भदौ ५ गते स्वास्थ्यमा समस्या भएपछि मेडिकल कलेज गएकी थिइन । परीक्षण गर्दा भदौ ७ गते कोरोना पुष्टि भएको थियो ।

कोरोना देखिएपछि उनी सोही दिनदेखि आइसोलेसनमा उपचाररत थिइन् । स्वास्थ्य अवस्था जटिल बन्दै गएपछि शुक्रबार बिहानदेखि भेन्टिलेटरमा राखेर उपचार भइरहेकोमा बेलुका मृत्यु भएको हो । उनी मुटु रोगी भएको बताइएको छ ।

यस्तै वीरगञ्ज–१२ मुर्ली की ६५ वर्षीया महिलाको उपचारकै क्रममा मृत्यु भएको छ । श्वासप्रश्वासमा समस्या भएपछि शुक्रबार दिउँसो २ बजेतिर नारायणी अस्पतालमा भर्ना भएकी महिलामा कोरोना संक्रमण पुष्टि भएको थियो । न्युन रक्तचापको समस्याले ग्रसित उनलाई पखाला पनि लागेको थियो ।

उपचारको क्रममा साँझ साढे पाँच बजेतिर उनको मृत्यु भएको अस्पतालले जनाएको छ । यससँगै वीरगञ्जमा कोरोनाबाट मृत्यु हुनेको संख्या ६५ पुगेको छ ।