वीरगञ्जमा रौतहटका संक्रमितको मृत्यु

१४ भदौ, वीरगञ्ज । पर्साको वीरगन्जमा रहेको कोभिड अस्पतालमा रौतहटका संक्रमितको मृत्यु भएको छ । वीरगन्जको गण्डक अस्थायी कोभिड अस्पतालमा आइतबार बिहान रौतटहको राजपुर तुलसीका ४० वर्षीय पुरुषको कोरोनाले मृत्यु भएको हो ।

मधुमेहका रोगी उनलाई कोरोना संक्रमण पुष्टि भएपछि भदौ १२ गते वीरगन्जस्थित गण्डक अस्थायी कोभिड अस्पतालमा ल्याएर भर्ना गरिएको थियो । कोभिड अस्पतालमै उपचारका क्रममा उनको आइतबार बिहान पौने ८ बजे मृत्यु भएको नारायणी अस्पतालका चिकित्सक डाक्टर अतुलेश चौरसीयाले जानकारी दिए ।

यसअघि शनिबार बेलुकी पनि वीरगन्ज हेल्थ केयर अस्थायी कोभिड अस्पतालमा रौतहटकै ३० वर्षीय संक्रमित पुरुषको मृत्यु भएको थियो । यससँगै वीरगन्जमा कोरोनाका कारण मृत्यु हुनेको संख्या ५० पुगेको छ ।