थुनुवालाई यातना दिने ३ प्रहरी निलम्बित

१६ भदौ, काठमाडौं । इलाका प्रहरी कार्यालय गरुडा रौतहटको थुनामा मृत्यु भएका अभियुक्त विजयराम चमारलाई चरम यातना दिने तीन जना प्रहरीलाई निलम्बन गरिएको छ ।

प्रारम्भिक छानविनका क्रममा चमारलाई यातना दिएको पाइएपछि रौतहटको गरुडास्थित इलाका प्रहरी कार्यालयका प्रहरी निरीक्षक नविनकुमार सिंह, हवल्दार मुन्नाकुमार सिंह र फिरोज मियालाई निलम्बन गरिएको हो ।

प्रदेश २ प्रहरी कार्यालयका प्रमुख डीआईजी धीरजप्रताप सिंहले तीन जनालाई निलम्बन गरिएको पुष्टि गरे । गृह मन्त्रालयको निर्देशनमा इलाका प्रशासन कार्यालय, चन्द्रनिगाहापुरका उपसचिव जोरेन्द्र अर्यालको नेतृत्वमा गठित छानबिन समितिले थप अनुसन्धान गरिरहेको छ ।

गरुडा नगरपालिका–८, जिगंडवाका २० वर्षीय निरन्जन रामको हत्या गरेको आरोपमा विजय चमारलाई साउन ३२ गते प्रहरीले पक्राउ गरेको थियो । प्रहरी हिरासतमा रहेकै बेला गम्भीर अवस्था भएपछि उपचारका क्रममा वीरगञ्जमा उनको मृत्यु भएको छ ।