पुल्चोकमा ट्राफिक प्रहरीमाथि निर्घात कुटपिट (भिडियोसहित)

१८ भदौ, काठमाडौं । रातो मत्स्येन्द्रनाथको रथ तान्ने क्रममा झडप हुँदा ट्राफिक प्रहरी जवान कमल घिमिरेमाथि निर्घात कुटपिट भएको छ । सामाजिक सञ्जाल फेसबुक तथा ट्वीटरमा भाइरल भएको भिडियोमा उनलाई दर्जन बढी स्थानीय युवाहरुले कुटपिट गरेका छन् ।

उनलाई मोटरसाइकलबाट थुतेर कुटपिट गरिएको हाे । हेलमेट टाउकोमा लगाएकै अवस्थामा उनलाई भुईमा लडाउँदै कुटपिट गरेको भिडियोमा देखिन्छ । सो भीडमा एकजना युवाले भने उनलाई जोगाएर भीडबाट पर लैजान खोज्दा फेरि अरु युवाले उनीमाथि कुटपिट गरेका छन् ।

पछि प्रहरीको विशेष फोर्स आएपछि मात्रै उनलाई सुरक्षित स्थानमा लिएको भिडियोमा देखिन्छ । घाइते प्रहरीको शर्ट पछाडीबाट च्यातिएको छ । उनको शरीरमा चोट लागेको छ । बिहान पुल्चोकमा अवस्था असामान्य हुँदै गएपछि उनी सवारी साधनलाई डाइभर्ट गर्न खटेका थिए ।

तर ड्युटीमै रहेका उनलाई स्थानीयले भने नराम्रोसँग कुटपिट गरेपछि सामाजिक सञ्जालमा यसको आलोचना भइरहेको छ । महागनरीय ट्रफिक प्रहरी प्रभाग मंगलबजारमा कार्यरत उनको अल्का अस्पतालमा उपचार भइरहेको छ।

हाट, खुट्टा, ढाठ र शरीरमा उनलाई चोट लागेको छ । उनी चढेको मोटरसाइकल स्थानीय युवाहरुले जलाई दिएका छन् । बा २ ब ७२४२ नम्बरको उनको मोटरसाइकलमा आन्दोलनकारीले जलाएपछि प्रहरीले पानी हालेर निभाएको थियो ।

बिहान रथ तान्ने क्रममा प्रहरीले अवरोध गरेपछि नेवार समुदायका युवाहरुले ढुंगामुढा गरेपछि झडप शुरु भएको थियो ।

भिडियो स्रोत : यो हो टिभीबाट