सेना, प्रहरी र सशस्त्रको तलब भत्ता रोकियो

१८ भदौ, काठमाडौं । कोरोना महामारीमा अग्रपंक्तिमा खटिएका सुरक्षाकर्मीको तलब रोकिएको छ । महामारी शुरु भएदेखि नै ज्यान फालेर काम गरेका सुरक्षाकर्मीको भत्ता नआएको चार महिनापछि तलब पनि रोकिएको हो ।

सरकारकै प्राविधिक कमजोरीका कारण सुरक्षाकर्मीले तलब पाउन नसकेका हुन् । महालेखा नियन्त्रकको कार्यालयले विकास गरेको नयाँ सफ्टवेयरमा डाटा इन्ट्री हुन नसक्दा नेपाली सेना, नेपाल प्रहरी र सशस्त्र प्रहरीको तलब रोकिएको जनाइएको छ ।

भदौ महिना सकिन लाग्दा पनि सुरक्षाकर्मीले साउनकै तलब पाउन सकेका छैनन् । तीन संगठनका सुरक्षाकर्मीको तलब रोकिएपछि काम गर्न जाँगर मरेको उच्च अधिकारीहरुको भनाई छ । भत्ताँ दिने भनेको सरकारले तलब समेत नदिएपछि केही सुरक्षाकर्मी आक्रोशित बनेका छन् ।

नयाँ सफ्टवेरमा डाटा इन्ट्रि गर्न समय लाग्ने भएपछि तलब रोकिएको दाबी छ । भत्ता दिने भनेर सबैभन्दा बढी जोखिममा रहेका प्रहरी काममा खटिएपनि भत्ता पाउन सकेका छैनन् । कतिपय सुरक्षाकर्मी आफैले आफ्नै पैसामा पीसीआर परीक्षण गर्नुपरेको छ ।

सरकारले चार महिनाअघि कोरोना भाइरसको महामारीमा खटिने सुरक्षाकर्मीलाई प्रोत्साहन भत्ता दिने निर्णय गरेको थियो । पीपीई लगाएर संक्रमित, आशंकित र क्वारेन्टाइन राख्ने व्यक्तिलाई समातेर ल्याउने र अस्पतालमा खटिने सुरक्षाकर्मीलाई शतप्रतिशत भत्ता दिने भनिएको थियो ।

यस्तै संक्रमित, आइसोलेसनमा रहेका र आशंका गरिएका विरामीको सुरक्षार्थ खटिएका र पीपीई लगाउन नपर्नेका लागि ५० प्रतिशत भत्ता दिने भनिएको थियो । लकडाउन र सामाजिक दूरी कायम गर्न खटिने सुरक्षाकर्मीलाई दैनिक ३ सय रुपैयाँ प्रोत्साहन भत्ता पाउने भनिएको थियो ।

तर अहिले पनि भत्ता नदिएपछि सुरक्षाकर्मी निराश छन् । त्यसमाथि अहिले सयौ प्रहरी, केही सेना र सशस्त्र नै संक्रमित हुँदा पनि सरकारबाट पाउनुपर्ने उचित सेवा, सुविधा र हौसला पाउन सकेका छैनन् ।