रामडाँडालाई नमुना पर्यटकीयस्थल बनाउने मेयर गिरीको संकल्प

♦ दिवश भण्डारी

१९ भदौ, स्याङ्जा । रामडाँडा, स्याङ्जाको एउटा सुन्दर धार्मिक र पर्यटकीय स्थल हो । स्याङ्जा चापाकोट नगरपालिकाको सेखाममा अवस्थित रहेको यो क्षेत्र अत्यन्तै सुन्दर र रमणीय छ ।

गर्मी महिनामा चिसो हावा लाग्ने यो क्षेत्रमा पर्यटकको भीड लाग्ने गर्छ । तर यसपटक कोरोनाले गर्दा धेरै मानिसहरु बाहिर हिड्न पाएका छैनन् । सेखाम डाँडामा विशाल चन्द्रसूर्य अंकित नेपालको झण्डा डाँडाको चुचुरोमा फर्फराउँदा धेरैको मन हावासरी उड्ने गरेको छ ।

घाँसे मैदानबाट कालीगण्डकी आसपास देखिने मनोरम दृश्य जति हेर्यो उति हेरु हेरु लाग्छ । सो क्षेत्रमा जति बस्यो, उति नै बसिरहन मन लाग्छ । साच्चै स्वर्गीय आनन्द प्राप्त हुने ठाउँ हो, रामडाँडा ।

भगवान रामको नामबाट नामकरण गरिएको रामडाँडा स्याङ्जा, पाल्पा, कास्की र तनहुँका स्थानीय तथा बाह्य पर्यटकको आकर्षणको केन्द्र हो । यसको संरचना थप विकास गर्न सकेमा यो क्षेत्र ठूलो पर्यटकीय सम्भावनातर्फ अघि बढ्ने स्थानीय सरोकारवालाहरुको धारणा छ ।

यही मेलाेमा हिजाे मात्र रामडाँडा पुगेका चापाकोट नगरपालिकाका मेयर शिवकुमार गिरिले चापाकोट नगरको आर्थिक सहयोगमा बन्दै गरेको भगवान शिवको मूर्तिको अवलोकन गरेका छन् ।

अवलोनकका क्रममा रामडाँडालाई प्रदेशकै नमुना धार्मिक एवंम पर्यटकीयस्थल बनाउने दृढ संकल्प लिएर अगाडी बढेको र आवश्यक भौतिक संशाधनको विकासका लागि चापाकोट नगरपालिकाले आर्थिक सहयोगको कार्यभार सम्हालिरहेको उनले बताए ।

स्थानीय सर्वसाधारणसहित चापाकोट नगरका प्रमुख शिवकुमार गिरि र चापाकोट नगरपालिका ५ का अध्यक्ष इन्द्र शाही सहितकाे टाेलीले बिहिबार रामडाँडामा निर्माणाधीन २५ फुट अग्लो भगवान शिव मूर्तिको अवलोकन गरेका थिए ।